INFPM halo selesaun ba empreza konkorre iha konkursu públiku ba akizisaun ai-moruk
DILI, 30 abril 2024 (TATOLI)–Diretór Nasionál ba Aprovizionamentu iha Institutu Nasionál Farmasia no Produtu Medikamentu (INFPM), Mariano da Silva, hateten INFPM halo hela selesaun ba empreza sira-ne’ebé konkorre ba konkursu públiku ba akizisaun medikamentu.
Mariano da Silva hateten empreza importadora ba aimoruk ne’e iha nasionál no mos internasionál barak mak submete hela dokumentu atu halo akizisaun ba ai-moruk.
“Prosesu kompra ba ai-moruk iha OJE 2024 ho orsamentu millaun $4.2 ne’e la’o hela. Ami-nia ekipa halo ona prosesu konkursu públiku. Iha ai-moruk item 159 ne´ebé atu sosa. Agora, iha hela faze avaliasaun komisaun de juri,” Diretór Nasionál ba Aprovizionamentu iha INFPM ne´ehateten ba Agência Tatoli iha Kampung Alor, tersa ne´e.
Prosesu selesaun ba dokmentu ne’e la’o hela ba empreza sira-ne’ebé submete ona dokumentu, maibé liuhusi prosesu sira-ne’e mak ai-moruk sei to’o iha fulan jullu tinan ida-ne´e, no ai-moruk sira-ne’ebé to’o mai mak hanesan ai-moruk vital, nesesáriu no esensiál hamutuk item 159.
Diretór ne’e hateten, regra sira-ne’e mak iha avaliasaun tékniku no finanseira, ezemplu presiza iha osan liu $100.000 ida iha sira-nia konta bankária.
“Tuir kalendáriu aprovizionamentu nian, produtu sira-ne’e sei to’o iha lullu ne’e, tuir prosesu konkursu públiku, tanba iha regra konkursu públiku ho osan liu rihun $100 ita presiza konkursu públiku. Ida-ne’e prosesu naruk uitoan,” nia dehan.
Jornalista : Jesuína Xavier
Editór : Cancio Ximenes
