INFPM sujere Governu altera regra aprovizionamentu sosa ai-moruk
DILI, 30 abril 2024 (TATOLI)–Diretór Nasionál ba Aprovizionamentu iha Institutu Nasionál Farmasia no Produtu Medikamentu (INFPM), Mariano da Silva, sujere ba Governu atu altera regara aprovizionamentu ba medikamentu iha INFPM, tanba prosesu hotu-hotu ba akizisaun ai-moruk ne’e kompleksu hahú husi konkursu públiku to’o sosa ai-moruk.
“Ai-moruk sira-ne’e atu sosa iha nia prosesu naruk ida. Anúnsiu ba konkursu púbiku de’it presiza loron 30 tuir lei aprovizionamentu, atu empreza sira submete dokumentu ba iha INFPM,” Diretór Nasionál ne´e hateten ba Agencia Tatoli iha niakna´ar fatik, Kampung Alor, tersa ne´e.
Nia hateten, se empreza hakarak no presiza medikamentu kontentór boot, ida-ne’e nia prosesu naruk tanba atu halo produsaun ba ai-moruk husi empreza ka fábrika presiza fulan tolu (3).
Anúnsiu loron 30 ne´e, empreza submete dokumentu no avalia presiza loron 10 no se bainhira iha empreza liu lima mak submete dokumentu, entaun presiza loron 15 atu avalia no hafoin anúnsiu ne´e presiza hein loron 10 atu hein protestu ruma, maibé se laiha protestu ruma mak bele publika.
Iha prosesu deliberasaun ne´e, empreza presiza hein loron 90 ka loron 120 nia laran, tanba ne’e mak presiza iha alterasaun ruma ba iha lei ne´e.
INFPM fó sujestaun ba iha Governu no Parlamentu Nasionál atu hadi’a legalidade konkursu públiku ba akizisaun medikamentu ba iha INFPM.
“Ami hato’o rekomendasaun lubuk ida ba iha komisaun sira iha Parlamentu Nasionál no no ami mós hato’o ona ba Governu ba atu hadi’a lei ka rejime espesiál ba kompra ai-moruk,” nia dehan.
Nia esplika, lei aprovizionamentu agora ne’e jerál tebe-tebes, Dekretu-Lei nú/22/2022 ne’e jerál liu ne’ebé la esplika klaru.
Nia reforsa, superiór sira presiza haree asuntu ne’e no halo mudansa ba lei, se lae prejudika ba prosesu aprovizionamentu ai-moruk tanba lei mak impede.
“Ami sei loke mós prosesu aprovizionamentu foun ida, halo prekualifikasaun empreza sira no to’o janeiru ne’e iha aprovasaun orsamentu bele akizisaun ba ai-moruk. Ida-ne’e esforsu ida-ne’ebé ami halo hela,” nia hateten.
Jornalista : Jesuína Xavier
Editór : Cancio Ximenes
