Japaun-UNDP no empreza timoroan realiza semináriu kona-bá dezenvolve ekonomia azúl
DILI, 30 abríl 2024 (TATOLI)– Governu Japaun liuhusi nia Embaxada iha Timor-Leste hamutuk ho UNDP, tersa ne’e, realiza semináriu ho empreza timoroan sira hodi prepara projetu importante haat ba empreza lokál sira atu aplika bainhira manán sei dezenvolve ekonómia azúl iha Timor-Leste.
“Projetu ida ne’e apoiu husi Governu Japaun atu tulun ba kompaña lokál sira iha Timor-Leste oinsá mak bele dezenvolve ekonómia azúl iha Timor-Leste,” Embaxadór Japaun Tetsuya Kimura, hatete ba jornalista sira iha salaun City8 Manleuana Dili, tersa ne’e.
Nia dehan, projetu hamutuk haat mak sei dezenvolve husi programa ne’e mak, peskaria sustentabilidade, turizmu sustentabilidade, poluisaun plástiku no jestaun mudansa klimátika.
Projetu ne’e sei loke oportunidade ba empreza timoroan sira hatama aplikasaun bainhira manán sei hetan orsamentu kada projetu hamutuk $40.000.
Iha fatin hanesan, Deputy Resident Representative of UNDP iha Timor-Leste, Adeline Carrier, afirma semináriu ne’e atu halibur informasaun ho emprezáriu lokál inklui akademista sira atubele fó ideia oinsá bele dezenvolve ekonomia azúl iha Timor-Leste.
“Programa ida ne’e UNDP servisu hamutuk ho Japaun, entaun ita realiza uluk semináriu ne’e atu halibur hanoin husi parte hotu, empreza lokál akedemista sira joven feto no mane sira fó uluk sira nia hanoin oinsá dezenvolve ekonomia azúl iha Timor-Leste, foin mak ami fó apoiu orsamentu ba empreza sira atu dezenvolve ekonomia azúl liuhusi projetu haat ne’ebé iha ona,” Adeline hatete.
Nia hatutan, Governu Timor-Leste halo ona estratejia oinsa dezenvolve ekonómia azúl atu halo diversifikasaun ba ekonomia Timor-Leste nian.
Projetu ne’e loke ba empreza husi nasaun hotu iha ASEAN hamutuk 700 atu apliku no husi númeru ne’e Timor-Leste empreza haat mak bele hetan oportunidade.
Dadaun ne’e Japaun hamutuk ho UNDP loke hela oportunidade ba empreza timoroan sira atu aplika nune’e bele sai manán na’in hodi implementa projetu ne’e.
Iha seminariu durante loron ida ne’e empreza lokál hamutuk 25 mak partisipa.
Notísia relevante:Governu tau prioridade ba elaborasaun polítika ekonomia azul
Jornalista: Hortencio Sanchez
Editór: Florencio Miranda Ximenes
