iklan

BOBONARO, HEADLINE, MUNISÍPIU

Autoridade Bobonaro planeia koloka seguransa iha kampu aviasaun Ritabou

Autoridade Bobonaro planeia koloka seguransa iha kampu aviasaun Ritabou

Kampu aviasaun Maliana, lokaliza iha ex Kodim, suku Ritabou, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 07 maiu 2024 (TATOLI)-Autoridade Munisipál Bobonaro (AMB), Alexandrino Pires, sei orienta Diresaun Nasionál Seguransa Patrimóniu Públiku, atu koloka membru seguransa ba iha kampu aviasaun ex Kodim, suku Ritabou, postu administrativu Maliana, hodi kontrola no asegura fasilidade públiku sira.

Prezidente Autoridade Munísipiu Bobonaro foti asaun referida, tanba iha tinan kotuk liubá, halo ona reablitasaun ba lutu sira liuhusi Programa Mão de Obra Postu administrativu (PMOPA), maibé agora ema deskoñesidu balu sobu estraga rede ne’ebé futu haleu kampu aviasaun ne’e.

Notísia relevante: PMOPA faze daruak iha Ritabou reabilita kampu aviasaun

“Ita orienta tau seguransa sivíl iha ne’ebá atu halo kontrola ba Aeroportu, ba rede ne’ebé komunidade sira sobu, ita sei buka meiu ho osan ne’ebé iha atu halo reabilitasaun ba rede,” nia informa ba jornalista sira iha Maliana, tersa ne’e.

Nia apela ba komunidade sira atu kumpri lei ijiene ordej públiku hodi labele husik livre animál iha areadór kampu aviasaun ne’e, tanba bele impede sirkulasaun aviaun ne’ebé tula pasiente ho situasaun emerjénsia.

Tuir nia, komunidade tenke obesede ba lei ne’ebé iha, tanba antes ne’e governu halo ona diseminasaun.

“Ita-nia lai hatete klaru animál muda ba kotuk, labele lori mai fatin públiku, sé lakohi obesede oho mate animál, lori fornese na’an sira ba ospitál no prizaun,” nia katak.

Diretór Interinu Diresaun Terra Propriedades, Delegasaun Territoriál Munisípiu Bobonaro, Castro Laco Martins, informa, ba oin sei notifika komunidade sira atu hamamuk rai ne’ebé utiliza  ba kuda-ai no halo to’os iha parte kampu aviasaun ninin tanba rai ne’e pertense ba proprietária estadu dezde tempu portugués.

Nia subliña, notifikasaun ne’e hato’o, tanba Autoridade Aviasaun Timor-Leste planu atu haluan tan espasu kampu aviasaun ne’e.

“Iha tinan 2022 ami ho Asosiasaun ne’ebé ne’ebé toma konta ba Aviasaun nian ne’e, ami ba haree ona kampu ne’e katak planu ba oin ne’e, atu alarga tan ninin sira ne’e nune’e kampu ne’e bele iha espasu luan, aban-bainrua aviaun boot mos bele tún iha Maliana,” nia katak.

Enkuantu tuir observasaun Agência Tatoli iha terrenu nota katak daudaun ne’e aviasaun Kontinua halo operasaun ativu hodi tula pasiente husi Opsitál Referál Maliana ba Hospital Nasionál Guidu Valadares (HNGV), Dili, maibé komunidade kontinua lori motorizada no karreta movimentu iha kampu laran iha kualkér tempu.

Kampu Aviasaun ne’e mos durante ne’e sai fatin ba komunidade sira aprende ka treinu karreta ho motorizada.

Notísia relevante: Komunidade labele husik animál iha kampu aviasaun Ritabou
Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!