DILI, 07 maiu 2024 (TATOLI) – Espoza husi Embaixadór husi nasaun oioin iha Timor-Leste prontu apoia programa Prezidente Repúblika, José Ramos Horta, nian ne’ebé fó hahan ba labarik sira iha resintu Palásiu Prezidensiál no Munisípiu balu atu kombate má-nutrisaun.
“Oportunidade di’ak ida ba ami, tanba ami hatene katak Prezidente Repúblika iha prograna di’ak atu prepara ba labarik sira, no depois ami sai parte husi Embaixada ne’ebé iha Dili, no ami hetan konvite atu haree katak ami besik liu ba servisu ne’ebé Prezidente Repúblika halo, oinsa ami bele apoiu programa ida ne’e kontinua ba oin hodi kombate má-nutrisaun,” dehan Espoza Embaixadór Indonézia iha Timor-Leste, Flantina Sari Mutiara Silalahi, ba jornalista sira iha Palásiu Presidente-Dili, tersa ne’e.
Reprezentante espoza Embaixadór hotu iha Timor-Leste ne’e afirma, prontu apoia programa ne’e tanba nu’udar feto sai mós inan ba oan sira no hakarak labarik sira iha Timor-Leste bele iha saúde ne’ebé di’ak.
“Ita hanoin suporta programa ne’e tanba ita mak inan sira ne’ebé iha oan, nune’e ita mós hakarak asegura katak labarik hotu-hotu liuliu labarik sira iha Timor Leste hetan nesésidade sira ne’ebé sira tenke hetan, hahán ne’ebé tein ona no seluk tan,” nia dehan.
Nia hatutan, Servisu ne’e di’ak tebes, no ikus mai hanesan programa espesiál ida husi Timor Leste, no sira mós mai nu’udar parte komunidade internasionál iha Timor Leste, haree katak ida ne’e mós sira nia apelu atu partisipa iha programa hotu-hotu ne’ebé Prezidente Repúblika halo ona.
“Meiu ida ne’e atu rezolve problema má-nutrisaun. Ami kontente tebes bele hasoru malu ho Prezidente Repúblika iha ne’e. Ko’alia asuntu importante kona-ba oinsa fó ai-han ba labarik sira,” nia tenik.
Durante hasoru malu, Prezidente Repúblika hato’o ba sira katak programa ne’ebé halo hodi kombate má-nutrisaun no labarik sira bele hetan ai-han ne’ebé di’ak ba saúde.
Nune’e, apoia ne’ebé espoza Embaixadór sira atu fó mak haree ba ai-han sira iha nutrisaun ou la’e, no tékniku kona-ba tein hahan ne’ebé ho kualidade ba labarik sira.
Tuir dadus ne’ebé iha espoza Embaixadór nian iha Timor-Leste hamutuk na’in-22 no ohin hasoru malu ho Prezidente Repúblika hamutuk na’in 15.
Rekorda fali katak, Kantina Matak iha Palásiu Prezidensiál Bairro-Pite harí husi Xefe Estadu atu tein hahan kada loron fó ba labarik se de’it hakarak han bele ba han. Hahan ne’ebé prepara iha Kantina Matak kualiade nutritivu ba labarik sira.
Kada loron labarik besik 800 mak ba han iha Kantina ne’e. Alende Kantina Matak iha mós uma ida iha Metinaro prepara mós hahan ba labarik sira estabelese husi Prezidente Repúblika.
Hahan ne’ebé prepara ba labarik sira ne’e hetan apoiu orsamentu husi Prezidente Repúblika nia kolega sira iha nasaun oioin iha mundu.
Notisia relevante: PR husu inan-aman tau matan no fó hahan nutritivu ba bebé
Jornalista: Hortencio Sanchez
Editór : Florencio Miranda Ximenes
