DILI, 16 maiu 2024 (TATOLI) – Primeiru-Ministru (PM) Kay Rala Xanana Gusmão, konsidera Timor-Leste nia liberdade imprensa la a’at liu iha mundu tanba nasaun demokrásia barak mós nia okupa númeru boot liu kompara ho Timor-Leste.
Xefe Governu dehan tan , ema balun preokupa katak index liberdade imprensa Timor-Leste nian tu’un tiha ona hosi 10 bá 20 iha nivel globál.
“Ema hotu preokupa katak liberdade imprensa Timor-Leste nian monu tanba karik Governu nia hahalok ruma proibe jornalista sira labele kritika mak tun ona, maibé atu hatete de’it katak ita la a’at liu iha mundu kompara ho nasaun seluk,” PM Xanana hatete ba jornalista sira iha Palásiu Prezidensiál Dili, kinta ne’e.
Notisia relevante: Liberdade imprensa iha Timor-Leste monu ba pozisaun da-20
Rekorda fali katak, Timor-Leste monu iha ranking liberdade imprensa ne’ebé fó sai husi Repórteres Sem Fronteiras iha Loron Liberdade Imprensa, iha 03 Maiu. Husi pozisaun da-10 iha tinan kotuk, país tun ba da-20, ho pontu 78,92 husi totál nasaun 180.
Tuir levantamentu ne’ebé halo husi RSF ba dezempeñu kada nasaun depende ba indikadór kontestuál lima mak hanesan iha kontestu polítiku, ekonómiku, lejizlativu, sosiál no seguransa.
Iha indikadór ekonómiku, Timor-Leste iha pozisaun da-23, ho pontu 65,36, lejizlativu iha pozisaun da-45, ho pontu 73,88, no sosiál iha pozisaun da-9, ho pontu 85,71. Iha indikadór seguransa, país iha pozisaun da-8, ho pontu 94,25. Ein termu análize iha kontestu polítiku, Timor-Leste iha pozisaun da-22, ho pontu 76,09.
Notisia relevante: PPN: Liberdade imprensa no espresaun nu’udar direitu fundamentál iha demokrasia
Jornalista: Hortencio Sanchez
Editór: Florencio Miranda Ximenes