DILI, 16 maiu 2024 (TATOLI)– Prezidente Repúblika (PR), José Ramos Horta, kondekora medalla “Ordem Colar de Timor-Leste” ba Profesóra Dewi Fortuna Anwar, durante Palestra Prezidensiál Serie II ne’ebé hala’o iha Palásiu Prezidensiál Nicolau Lobato, kinta ne’e.
“Xefe Estadu kondekora Dewi Fortuna Anwar tanba iha tinan 20-resin ba kotuk nu’udar asesora ida-ne’ebé besik liu ho Prezidente Repúblika Indonézia, BJ Habibie, iha 1999 bainhira nia-konkorda ho referendum iha Timor-Leste, iha ne’ebé 78.50% vota ba independénsia no husik Indonézia,” refere iha nota ne’ebé Agência TATOLI asesu, ohin.
Akadémiku no figura polítika kuñesidu Indonézia niań, Profesóra Dewi Fortuna Anwar, daudaun hanesan Profesora Peskiza iha Sentru Peskiza ba Polítika-Ajensia Nasionál ba Peskiza no Inovasaun (PRP-BRIN), Prezidente Konsellu Administrasaun iha Sentru Habibie, no Akadémiku iha Komisaun Siénsia Sosiál (AIPI).
Anwar harii hamutuk Komisaun Polítika Estranjeiru Indonézia nian no hala’o ona kna’ar asesória ba organizasaun internasionál oin-oin, inklui Konsellu Konsultivu Sekretáriu Jerál ONU nian kona-ba Asuntu Dezarmamentu.
Hafoin serimónia kondekorasaun, Prezidente Ramos Horta organiza Serie Palestra Prezidensiál II tinan 2024 ho tema “Seguransa Rejionál no Diplomasia iha Sudeste Áziatiku, Dezafiu no Oportunidade sira.
Palestra ne’e ho objetivu atu fornese vizaun komprensivu ida kona-ba dezafiu no oportunidade signifikativu sira ne’ebé Sudeste Áziatiku hasoru daudaun iha área seguransa no diplomátika.
Liuhusi promove kompriensaun kle’an liután kona-ba dinámika hirak-ne’e, ho fokus espesífiku ba sira-nia impaktu ba Indonézia no Timor-Leste, palestra ne’e hakarak kontribui ba diskusaun informadu no solusaun kolaborativu ba rejiaun ida-ne’ebé estavel no prosperu liu.
Profesór Dewi Fortuna Anwar hato’o palestra ne’e, hodi fahe nia esperiénsia lubun boot iha akadémika, governu no aktivizmu hodi analiza senáriu atual seguransa nian no esforsu diplomátiku sira iha rejiaun laran. Nia esperiénsia mak iha polítika esterna Indonézia nian, demokratizasaun, ASEAN, no asuntu polítika no seguransa rejionál. Palestra ida-ne’e fó atensaun partikulár ba oinsá dinámika hirak-ne’e fó impaktu ba Indonézia no Timor-Leste.
Palestra Prezidensiál Serie II kona-ba “Seguransa Rejionál no Diplomasia iha Sudeste Áziatiku, Dezafiu no Oportunidade sira” hetan partisipasaun husi audensia barak iha Timor-Leste ne’ebé interese ba Asuntus Sudeste Áziatiku.
Notisia relevante: PR Horta kondekora Ngoji Okonjo-Iweala ho kolár ordem Timor-Leste
Jornalista: Hortencio Sanchez
Editór : Florencio Miranda Ximenes
