Embaixada Indonézia organiza semináriu diskursu públiku iha Bobonaro
BOBONARO, 24 maiu 2024 (TATOLI)-Embaixada Repúblika Indonézia mai Timor-Leste (KBRI, sigla indonézia) liuhusi servisu hamutuk ho Banku Mandiri, sesta ne’e organiza semináriu ida kona-ba Public Speaking ka diskursu Públiku ba membru Polísia Nasionál Timor-Leste (PNTL) Munisípiu Bobonaro.
Adidu Polísia Repúblika Indonézia (POLRI) iha KBRI Dili, Kombes Pol Don Gaspar Mike da Costa, esplika, atividade ne’e realiza ho objetivu atu hakbi’it membru PNTL Bobonaro sira-nia kapasidade no abilidade komunikasaun polisiál iha atendimentu públiku.
“Ita realiza public speaking tanba servisu polísia hasoru komunidade, ho ida ne’e polísia tenke kompre oinsá ko’alia ho komunidade, komprende komunidade nia hanoin, depois mak bele fó informasaun polísia ho loloos. Ho ida-ne’e mak ita presiza fó informasaun, bainhira ita ko’alia, saida mak ita ko’alia, saida mak ita-nia kapasidade, ita atu ko’alia ho sé no sé mak atu rona ita,” nia informa ba jornalista sira iha Kámara Ekleziástika Dioseze Maliana.
Adidu POLRI iha KBRI Dili ne’e hatutan, atividade ne’e realiza ho intensaun atu apoiu dezenvolve rekursu umanu iha komandu PNTL Bobonaro sai profisionál liután no sai polísia internasionál, demokrátiku hanesan ho nasaun sira seluk.
POLRI kontinua iha komitmentu atu apoia PNTL ne’ebé foka ba asuntu prinsipál tolu hanesan troka informasaun ba malu, dezenvolve kapasidade rekursu umanu no halo prevensaun krime trans nasionál iha área fronteira, bazeia ba akordu koperasaun ne’ebé POLRI ho PNTL halo iha tinan 2009 hafoin halo revizaun iha 2012.
“Ita ida de’it, tanba pulau ida de’it administrasaun mak rua, maibé ita ema Timor, ne’e duni instituisaun POLRI ho PNTL ne’e tenke metin no di’ak atubele asegura paz no estabilidade iha rejiaun ne’e hanesan parte ida husi seguransa ba mundu,” nia hateten.
Sekretáriu Autoridade Munisipál Bobonaro ba Asuntu Administrasaun no Finansa, Domingos da Costa, agradese ba KBRI tanba liuhosi atividade ne’e bele ajuda ona membru PNTL halo servisu iha terrenu ho profisionál liután.
“Ida-ne’e importante tebes, tanba ita atu sai profisionál ne’e la’ós haree liu ba abilitasaun literaria, maibé liuhusi formasaun sira hanesan bele aumenta ita-nia esperiénsia oinsá atu hadi’ak liután imi-nia servisu,” nia akresenta.
Komandante PNTL Munisípiu Bobonaro, Superintendente Xefe Agustino Gomes da Silva, konsidera public speaking ne’e importante tebes ba membru sira, liuliu lideransa no membru Ofisiál Polísia Suku (OPS) hodi bele presta atendimentu públiku ho kualidade no profisionál.
“Sira diariamente ne’e halo komunikasaun ho ita-nia komunidade iha baze, entaun presiza iha koñesimentu ne’ebé di’ak kona-ba diskursu públiku no komunikasaun polisiál,” nia subliña.
Notísia relevante: PNTL Simu Oferta Supermie Kaixa 970 Hosi KBRI no Mie Sedap
Jornalista: Sérgio da Cruz
Editór: Evaristo Soares Martins
