VIQUEQUE, 27 maiu 2024 (TATOLI)- Polísia Nasionál Timor Leste (PNTL) munisípiu Viqueque liuhusi Unidade Polísiamentu Komunitária (UPK), segunda ne’e, desimina Lei Kódigu Estrada ba abitante sira iha postu administrativu Uatulari, munisípiu Viqueque.
Objetivu husi desiminasaun ne’e hodi habelar seguransa rodaviáriu tuir Dekretu-Lei númeru 6/2003, loron 3 Abril, kona-ba Kódigu Estrada atu utilizadór sira bele kumprende, uza estrada públiku tanba iha munisípiu Viqueque liuliu postu Uatulari iha violasaun maka’as ba Kódigu Estrada.
“Kona-ba seguransa rodaváriu iha postu Uatulari ita haree disipliña sosiál ba kumprimenta kódigu estrada sei menus liu. Purzemplu ita-nia oan sira iha Uatulari uza motorizada barak mak sei la uza kapasete. Kapasete ne’e nu’udar komponente ida husi lei kádigu estrada. Ho ida-ne’e, ami sosializa ba inan-amán sira atu hatutan ba oan sira-ne’ebé uza ka lori motorizada tenke uza kapasete tanba PNTL nota hahú husi postu Uatulari to’o área Beaço maioria la uza kapasete.”, Tuir Komadante Polísia Nasionál Timor Leste (PNTL) munisípiu Viqueque, Superintendente António Rego Fernandes, hateten iha diálogu iha salaun parokia Uatulari, ohin.
Ho desiminasaun ne’e, abitante no autoridade sira hodi fila introdús fali ba oan no família sira iha uma, atu ba oin labele vióla tan Kódigu Estrada tanba la kumpre multa selu $30.
Iha biban ne’e, Veteranu postu Uatulari, Afonso da Silva ‘Kalic’, agradese ba PNTL munisípiu Viqueque fó ona desiminasaun lei Kódigu Estrada ba abitante postu Uatulari no ba oin PNTL presiza halo kontrolu ba labarik minoridade sira-ne’ebé uza motorizada iha postu Uatulari tanba iha lei kódigu estrada labarik idade husi 16 mai karik proibe uza motorizada.
“Ha’u husu ba PNTL tenke haree labarik minoridade sira-ne’ebé oin loron utiliza motorizada la ho kapasete tanba ita ba haree ema-nia postu seluk ema hotu-hotu kumpri lei, maibé ba Uatulari ita sente lei ne’e laiha liu”, nia sujere.
Iha desiminasaun ne’e hetan partisipa husi veteranu, juventude, profesór, autoridade komunitária husi suku hitu hanesan Uma-Uain Leten, Macadique, Matahoi, Uaitame, Afaloikai, Babulu no Vessoru.
Notísia relevante: DRTT no PNTL sensibiliza dekretu-lei kódigu estrada ba motorista Tum Tum Oé-Cusse
Jornalista : Vitorino Lopes da Costa
Editór : Florencio Miranda Ximenes
