EBF Manu-Aman Nunura presiza tán manorin na’in-rua

BOBONARO, 03 juñu 2024 (TATOLI) – Ensinu Báziku Filiál (EBF) Manu-Aman iha Nunura, suku Tapo-Memo, postu administrativu Maliana, munisípiu Bobonaro, presiza tán manorin na’in-rua hodi apoia prosesu ensinu no aprendizajen ba estudante sira.

Koordenadór EBF Manu-Aman, Leonardo da Silva, informa, foin lalais ne’e EBF Manu-Aman hetan kolokasaun profesór na’in-ida husi Ministériu Edukasaun, maibé to’o agora manorin ne’e seidauk aprezenta-aan ba eskola.

Tuir nia, ho kolokasaun ne’e nafatin seidauk bele rezolve problema, tanba daudaun ne’e profesór permanente na’in-ida tama ona ba idade reforma, hela de’it na’in-tolu mak ativu iha eskola.

Notísia relevante: Edukasaun Bobonaro koloka profesór 67 ba eskola 43

“Ami-nia eskola ne’e husi primeiru-anu to’o sestu-anu, ne’e presiza ema na’in-neen tanba sala neen, foin lalais koloka tán na’in ida mai, ne’e mós seidauk sufisiente, tanba ami na’in-tolu de’it ona, ida fali mós tama ona idade reforma, agora ida foun ne’e mai karik ami na’in-haat, ne’ebé sei presiza tan na’in-rua,” nia informa ba Tatoli iha kna’ar fatin, segunda ne’e.

Nia dehan, EBF ne’e enfrenta problema menus rekursu umanu hafoin Ministériu Edukasaun hasai sirkulár ida hodi hapara profesór kontratadu 2023 iha fulan-dezembru tinan kotuk.

Leonardo akresenta, problema ne’e afeta maka’as ba ensinu no aprendizajen, nune’e obrigatóriu manorin ida kada loron tenke hanorin multi-klase.

“Ami-nia ensinu no aprendizajen la’o ladún di’ak, tanba menus profesór, obrigatoriu ita-nia profesór ida tenke ser hanorin sala rua, primeiru-anu no segundu-anu, depois terseiru-anu ho kuartu-anu mós hamutuk iha sala ida, ami sente todan loos, maibé ita atu halo nusá tanba ita atu husik de’it mós ladi’ak, labarik sira la hetene buat ida,” Jerente eskola ne’e hateten.

Nia rekomenda ba Ministériu Edukasaun atu tau-matan ba infraestrutura eskolár ne’e tanba fizikamente eskola ne’e bele fó ameasa ba estudante no manorin sira-nia vida.

“Eskola ne’e halo iha 2009 liu hosi pakote refendu, agora la di’ak ona, tempu anin ne’e ami ba uma, dader mai fali ne’e dalaruma piku monu hotu, entaun ami foti fali piku sira ne’e prega hodi taka fali,” nia katak.

Enkuantu EBF Manu-Aman akumula estudante husi primeiru-anu to’o sestu-anu hamutuk na’in 100-resin.

Notísia relevante: Edukasaun Bobonaro sei implementa merenda eskolár iha semana oin

Jornalista: Sérgio da Cruz
Editór: Evaristo Soares Martins