DESPORTU, HEADLINE

Argentina prontu apoia Timor-Leste dezenvolve futeból

Argentina prontu apoia Timor-Leste dezenvolve futeból

Diretór Jerál Asuntu Bilaterál Minstériu Negósiu Estranjeiru no Kooperasaun (MNEK), Francisco Dionisio "Maucura"

DILI, 05 juñu 2024 (TATOLI) – Diretór Jerál ba Asuntu Bilaterál Amérika, Afrika no Europa iha Ministériu Negósiu Estranjeiru no Kooperasaun (MNEK),Francisco Dionisio Maucura hateten, foin lalais Embaixadór Argentina mai Timor-Leste hakarak hametin kooperasaun ho Timor-Leste hodi dezenvolve futeból no área seluk ne’ebé fó benefísiu ba nasaun ne’e.

“Foin dadaun Embaixadór husi Argentina mai vizita Timor-Leste. Durante vizita ita ko’alia no konkorda malu atu dezenvolve futeból iha Timor-Leste tanba ita haree Argentina nasaun ida ne’ebé foin kampiaun kopa Mundiál, entaun sira hakarak suporta ita nia futeból liuhusi formasaun sira ba ita nia jogadór,” Maucura katak ba Agência TATOLI iha edifisiu MNEK Dili, kuarta ne’e.

Nune’e, MNEK sei koordena ho Ministériu Juventude Desportu Arte no Kultura (MJDAL) atu haree hodi hametin relasaun bilaterál ho Argentina iha futeból.

“Agora ho Argentina ita tama ona iha faze haree ba prosesu sira legaliade hodi hamosu akordu, nune’e ita bele submete ita nia proposta, iha desportu nian hanesan klinika futeból, akademia futeból nune’e prepara mós ita nia selesaun nasionál hahú U-12 to’o U-19 sai selesaun ida ne’ebé forte,” nia katak.

Daudaun ne’e, Timor-Leste iha ambisaun atu hadi’a prestasaun futeból iha Sudeste Aziatiku ho nune’e kooperasaun ho Argentina la’o ona bele hadi’a Timor-Leste nia prestaun liuhusi materia ba jogadór sira.

Alende kooperasaun iha futeból Argentina hakarak koopera mós ho Timor-Leste iha área agrikultura no enerjia renovavél.

Hametin kooperasaun bilaterál ho Xile

Alende ne’e,  Xile hanesan mós nasaun ida ne’ebé lokaliza iha Amérika Latina konfirmadu ona hakarak hametin kooperasaun ho Timor-Leste iha indústria peska.

“Xile konkorda ona hakarak hametin kooperasaun billaterál ho ita, liuliu iha área indústria peska nian halo prosesu ba ikan maran atu halo exportasaun ba li’ur tanba ita nia tasi ne’ebé luan ho ikan barak,” nia hateten.

Nia dehan, Xile nasaun ne’ebé iha indústria boot kona-ba prodús ikan maran hodi exporta ba merkadu internasionál.

Ho nune’e, Timor-Leste tenke hametin kooperasaun ho nasaun sira hanesan ne’e hodi dezenvolve setór peska hodi hatama reseita ba Estadu.

Nia relata, prosesu kooperasaun MNEK diresaun bilaterál prepara ona iha tempu besik bele asina ona akordu hodi hakat ba inplementasaun.

Notísia relevante: PR simu karta kredensiál husi Embaixadór Argentina, Chile no Ghana

Jornalista: Hortencio Sachez

Editór        : Florencio Miranda Ximenes

iklan
iklan

Leave a Reply

iklan
error: Content is protected !!