Delegasaun Vatikanu rekomenda empreza JOVA konstrui rampa iha CCD
DILI, 05 juñu 2024 (TATOLI)–Jerente Empreza JOVA Construction Unipesoál, Lda, Jaime D.S, Gusmão, hateten iha projetu reabilitasaun Sentru Konvensaun Dili (CCD) ne’e, delegasaun Vatikanu rekomenda ba kompaña atu konstrui rampa no kazadebañu foun iha CCD laran.
Iha tersa (04 juñu) ne’e, nia dehan, delegasaun vatikanu halo avaliasaun ba progresu projetu reabilitasaun Sentru Konvensaun Dili (CCD, sigla portugés) ne’e ho persentajen di’ak, tanba projetu reabilitasaun ne’e atinje ona 85%.
Iha inspesaun ne’e, delegasaun Vatikanu rekomenda hela buat balun ne’ebé empreza presiza hadi’a, entaun iha loron ohin (kuarta, 05 maiu) ne’e, traballadór sira hahú hala’o konstrusaun hodi kompleta rekomendasaun sira-ne’e.
“Sira rekomenda atu hatun kemiringan rampa hodi labele aas liu no rekomenda mós harii rampa iha CCD nian, toilet foun ba Santo Padre no padre madre sira nian. Ami komesa harii no semana rua (2) tan ami bele konklui,” Jaime D.S. Gusmão hateten ba Agência Tatoli, iha Sentru Konvensaun Dili (CCD, sigla portugés) iha Merkadu Lama, kuarta ne’e.
Delegasaun vatikanu mós rekomenda ba empreza atu konstrusaun palku foun tolu (3) iha li’ur, atu prepara ba jornalistas sira halo kobertura.
“Ida-ne’e rekomensaun foun ne’ebé ami atu halo. Ami sei halo mós dalan foun ida iha kotuk ba palku ninian ne’e,” nia hateten.
Nia garante, proposta rekomendasaun sira-ne’e korresponde ba projetu reabilitasaun hela persentajen 15% de’it, hodi termina obra projetu iha Sentru Konvensaun Dili (CCD) ne’e.
“Rekomendasaun foun ne’e mak pavin ba kuda ai-funan iha uitoan fatin rua iha oin ne’e, no chor tan saluran uitoan ne’e de’it. Ida faze primeiru ami halo hotu ona, hela mak rekomendasaun foun ne’e de’it,” nia dehan.
Konstrusaun ba rampa no kazadebañu ne’ebé rekomenda husi delegasaun vatikanu ne’e, nia dehan, sei konklui lalais tanba sura ho ida-ne’e mak projetu obra ne’e hela 15%.
“Semana rua tan, sei termina konstrusaun obra ne’e,” nia hateten.
Notísia Relevante: Delegasaun vatikanu apresia preparasaun Igreja-Estadu TL atu simu Papa Francisco
Jornalista : Jesuína Xavier
Editór : Cancio Ximenes
