DILI, 06 Juñu 2024 (TATOLI) – Timor-Leste Press Uniaun (TLPU) submete ona karta ba Prezidente Autoridade Rejiaun Administrativa Espesiál Oé-Cusse Ambenu (RAEOA), Rogério Tiago Lobato, hodi husu demite pesoál protokolu Aquito Roxaca Guterres husi ninia knaar tanba konsidera hamate liberdade imprensa iha país.
Sekretáriu-Jerál TLPU, Zezito da Silva, hateten karta ne’ebé dirije ba Prezidente Autoridade RAEOA, liuhusi nia sekretariadu iha Dili. Karta ne’e asosiasaun sira submete relasiona ho kazu protokolu PA RAEOA rasta monu jornaslita destakadu Tatoli I.P Abílio Elo Nini bainhira hala’o knaar hodi kobre atividade asina akordu entre PA RAEOA ho reprezentante Timor Aid, iha otél Ambeno.
“Protokolu ne’e laiha respeitu ba serbisu ne’ebé jornalista sira halo. Iha momentu ne’ebá, nia halo asaun brutalizmu hodi dada monu maluk jornalista destakadu Tatoli, depois nia tenta atu tuku tan jornalista ne’e iha otél Ambeno”, Zezito da Silva preokupa bainhira aprezenta karta iha sekretariadu PA RAEOA, iha Timor Lodge, Comoro, ohin.
Ho asaun ne’ebé pesoál protokolu ne’e halo, asosiasaun jornalista sira lamenta tebes no konsidera nu’udar atu premanizmu no brutalizmu. Tanba ne’e, asosiasaun sira husu ba Prezidente Autoridade RAOEA atu haree asuntu ne’e ho sériu hodi fó xamada ka demite ba protokolu ne’e husi ninia kargu.
“Tanba nia rasik la hatene ninia serbisu no nia mós la komprede serbisu jornalista sira-nian iha terrenu, nomós la obedese ba Konstituisaun Repúblika Demokrátika Timor-Leste, artigu 40 no 41, kona-ba liberdade imprensa no liberdade espresaun”, dehan.
Husi konteúdu karta ne’ebé asosiasaun jornalista sira submete ona ba PA RAEOA, TLPU ne’ebé ho misaun fó advokasia ba liberdade imprensa no liberdade espresaun hodi hametin demokrásia, ne’ebé previstu ona iha Konstituisaun iha artigu 40 no 41, ko’alia kona-ba promove direitu sira ba liberdade imprensa no direitu ba asesu ba informasaun nian.
TLPU nu’udar organizasaun ne’ebé fó mahon ba jornalista timoroan tomak ho objetivu atu promove no defende direitu jornalista sira-nian bainhira hala’o kn’ar profisionál iha órgaun komunikasaun sosiál.
Iha Lei Komunikasaun Sosiál artigu 8.º ne’ebé sita katak liberdade imprensa ba direitu jornalista sira-nian hodi fó-hatene ka ezerse tuir prerogativa konstitusionál, labele sai nu’udar objetu influénsia, independénsia tanba iha direitu hodi buka no hetan informasaun ne’ebé ba interese públiku.
Artigu 19.º husi lei ne’e mós sita kona-b garante jornalista sira-nia direitu hodi hetan dalan ba fonte ofisiál informasaun liuhusi eventu hotu-hotu ne’ebé nakloke ba ema tomak no nakloke ba órgaun sira komunikasaun sosiál tomak hodi rekolla informasaun importante sira ba públiku.
“Iha Lei Komunikasaun Sosiál artigu 41.º kona-ba atentadu ba liberdade informasaun, ema sivíl ka funsionáriu públiku ka ajente Estadu, ne’ebé impede serbisu jornalista ka komete atentadu ba liberdade imprensa sei hetan kastigu ho pena-prizaun to’o másimu tinan tolu ka multa”, dehan.
Ho baze ba Konstituisaun RDTL artigu 40 no 41, nomós Lei Komunikasaun Sosiál iha artigu 8.º no 41.º ne’e maka TLPU lamenta no kondena atitude ne’ebé komete husi pesoál protokolu PA RAEOA ho naran Aquito Roxaca Guterres, ne’ebé rasta monu no tenta atu tuku tan jornalista Abílio Elo Nini bainhira hala’o hela atividade jornalístika nian iha otél Ambeno.
Notísia relevante: KI: Hahalok husi protokolu PA RAEOA laiha étika
Rekorde katak kazu ne’e akontese iha otél Ambeno, iha tersa-feira tuku 17:00, iha ámbitu serimónia asinatura akordu entre PA RAEOA no reprezentante Timor Aid atu estabelese Muzeu Tais Timór iha Oé-Cusse.
TLPU konsidera asaun ne’e krime tanba impende serbisu jornalista sira-nian, nomós tentativa ida-ne’ebé fó ameasa ba liberdade imprensa no espresaun ne’ebé garante ona iha Konstituisaun.
“TLPU mós husu PA RAEOA halo demisaun ba funsionáriu ka protokolu referidu tanba la respeita lei hirak ne’ebé vigora iha Timor-Leste”, Zezito da Silva afirma.
Notísia relevante: Deputada CNRT lamenta protokolu PA RAEOA impede serbisu jornalista
Jornalista: Tomé Amado
Editora: Maria Auxiliadora
