Hamorin TL nia-naran, Governu atribui ona subsídiu rihun $22 ba atleta Felisberto
DILI, 10 juñu 2024 (TATOLI) – Atleta husi modalidade atletizmu,Felisberto de Deus, susesu iha nia kareira nu’udar kuridadór konsege hamorin Timor-Leste nia naran iha eventu internasionál sira iha rai-liur no rekolla ona osan ba nia aan hamutuk $22.000.
“Durante ne’e ha’u esforsu maka’as iha ha’u nia kareira hanesan atleta atletizmu, ikus ha’u konsege konkista duni saida mak ha’u nia hakarak, ha’u sai manán na’in iha eventu SEA Games Vietnam hanesan segundu lugar, iha fali ASEAN University Games mós ha’u nafatin segundu lugar no eventu nasionál sira mós ha’u sempre manán. Osan ne’ebé ha’u hetan husi Governu to’o agora hamutuk $22.000,” Felisberto katak ba Agência TATOLI iha Dili, ohin.
Nia dehan, osan ne’ebé nia hetan investe ona ba nia estudu, ajuda selu mós nia alin sira nia eskola no halo uma ida ba nia Papa ho Mama iha Letefoho Munisípiu Ermera.
“Osan ne’ebé ha’u hetan husi Governu, balun hau selu ha’u nia eskola, balu selu alin sira nia eskola no ha’u konsege harii ona uma ida ba ha’u nia Papa ho Mama atu hela,” atleta ne’e tenik.
Ho idade ne’ebé sei produtivu Felisberto kontinua esforsu hodi hala’o treinamentu kada loron hodi hasa’e nia prestasaun nu’udar atleta iha eventu nasionál no internasionál.
“Fulan hira tan ami sei ba kompete iha ASEAN University Games iha Indonézia, ha’u nafatin esforsu aan nune’e ha’u bele hamorin tan Timor-Leste nia naran. Ho treinamentu ne’ebé ha’u nia treinadór sira fó mai ha’u, ha’u sei ezekuta ho di’ak atu hatudu rezultadu di’ak iha eventu ne’e,” nia katak.
Vitoria ne’ebé Felisberto rekolla mak hanesan, segundu lugar iha eventu atletizmu SEA Games Vietnam 2022, segundu no terseiru lugar ASEAN University Games 2023, Filipina Open Atletic 2017 hetan primeiru lugar no iha Macao HalfMarathon terseiru lugar iha tinan 2018.
Iha eventu nasionál atleta ran Ermera ne’e konsege konkista vitoria hanesan primeiru lugar lala sia iha kampionatu nasionál ne’ebé organiza husi Federasaun Atletizmu Timor-Leste (FATL) no sai kampiaun ba Dili Maratona hamutuk dala haat.
Biografia badak
Felisberto moris iha Ernera 07 juñu 1999 oan husi Martinho de Deus no Martinha Asunção de Deus husi maun alin hamutuk na’in hitu.
Felisberto hahú nia kareira hanesan atleta ba atletizmu iha tinan 2015 konsege hatudu kedan prestasaun ne’ebé di’ak to’o ohin loron.
Notísia relevante:Governu atribui ona subsídiu ba atleta ho prestasaun di’ak iha jogu internasionál
Jornalista: Hortencio Sanchez
Editór: Florencio Miranda Ximenes
