iklan

EKONOMIA, BOBONARO, HEADLINE, MUNISÍPIU

Autoridade Bobonaro bandu negosiante sira fa’an ikan iha rotunda Maliana

Autoridade Bobonaro bandu negosiante sira fa’an ikan iha rotunda Maliana

Rotunda kapitál Maliana, munisípiu Bobonaro. Imajen Tatoli/Sérgio da Cruz.

BOBONARO, 13 juñu 2024 (TATOLI) – Autoridade Munisipál Bobonaro (AMB) liuhusi Diresaun Servisu Munisipál Jestaun Merkadu no Turizmu, lideradu Paulo do Santos, bandu negosiante sira atu fa’an ikan hodi okupa espasu públiku sira hanesan estrada ninin liuliu iha Rotunda Maliana Vila, munisípiu Bobonaro.

Paulo dos Santos orienta ona jestór merkadu Maliana na’in-haat atu kontrola negosiante sira halo atividade negósiu ikan iha fatin ne’ebé prepara ona.

Notísia relevante: Presu nesesidade bázika iha merkadu Maliana normál

“Ami durante ne’e laiha informasaun dehan lokraik-lokraik fa’an iha-ne’ebá, ha’u sei halo enkontru jestór na’in-haat, la’ós duni lae, bolu sira didi’ak, Rotunda nian ne’e labele tanba atu kria ninia kondisaun, kuadru boot sei hatún depois liga ho lampu, ne’ebé Rotunda labele fa’an sasán iha-ne’ebá,” Diretór Servisu Munisipál Jestaun Merkadu no Turizmu, Paulo dos Santos, informa ba Jornalista sira, iha Maliana.

Verónica de Jesus Maia, nu’udar abitante lokál agradese no espera ho intervensaun ne’e bele fó hanoin ona ba negosiante sira halo atividade negósiu iha fatin referida, tanba fatin hirak-ne’e espasu ba ema no transporte atu halo movimentu ba mai.

“Ha’u, lokraik-lokraik haree ne’e iha loja SEARA oin Bundaran nia ne’e, atividade negósiu ne’e maka’as loos, ema fa’an ikan, modo-tahan sabratu loos, ita haree hanesan merkadu Maliana muda tiha mai, tanba ema barak loos ne’e, dalaruma motorizada ho karreta ita la’o-ain moos ladi’ak,” nia akresenta ba Tatoli, kinta ne’e.

Enkuantu fatin ne’ebé durante ne’e negosiante sira utiliza hodi halo atividade negósiu ikan iha merkadu Maliana nia kotuk iha área Obor, suku Raifun.

Notísia relevante: Vise PPN preokupa merkadu rua iha Maliana abandona

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!