iklan

INTERNASIONÁL, DILI, HEADLINE

Governu halo esforsu translada mate-isin Domingos do Rego mai Timor-Leste

Governu halo esforsu translada mate-isin Domingos do Rego mai Timor-Leste

Ministru Negósius Estranjeirus no Kooperasaun Bendito dos Santos Freitas. Imajen Tatoli/Egas Cristóvão

DILI, 13 juñu 2024 (TATOLI) – Governu liuhusi Ministériu Negósiu Estranjeiru no Kooperasaun (MNEK), hala’o hela koordenasaun ho Governu Portugal atubele translada mate isin Domingos do Rego, ne’ebé hakotu iis hafoin konfrontu iha Fátima, foin lalais, mai iha Timor-Leste.

Konfrontu ne’ebé envolve husi Membru Grupu Arte Marsiál no Arte Rituál ne’e rezulta joven mane ida ho naran Domingos do Rego, moris iha loron 1 Dezembru 1998, husi Tula Takeu, Munisípiu Aileu, lakon vida no joven seluk kanek.

Nune’e, Ministru Negósiu Estranjeiru no Kooperasaun (MNEK), Bendito Freitas, hateten, Governu liuhusi Konsellu Ministru aprova ona hodi fó asisténsia tomak atu lori fila mate isin Domingos Rego husi Portugal mai Timor-Leste.

“Ita nia preparasaun ida mak atu halo transladasaun ou lori mate isin maluk timoroan ida ne’ebé mate iha Portugal fila mai Timor-Leste, ida ne’e Governu liuhusi Konsellu Ministru no Primeiru-Ministru aprova no konkorda atu Governu mak fó asisténsia tomak to’o mate-isin ne’e mai iha Timor-Leste,” Ministru Bendito hatete ba jornalista sira iha edifisiu MNEK Dili, kinta ne’e.

Nia esplika, Governu fó asisténsia hotu tanba prinsipiu protesaun ba sidadaun hanesan servisu diplomasia.

“Ida ne’e dever Governu nian atu fó asisténsia ba nia sidadaun sira bainhira hasoru difikuldade hanesan ne’e iha rai liu’r. Situasaun ida ne’e lamentavél tebes, la’ós katak atu nune’e para repete bebeik, ida ne’e atu hola avaliasaun nune’e timoroan atu sai ba rai-li’ur tenke tetu didi’ak,” Governante ne’e afirma.

Akontesimentu foin lalais iha Fátima Portugal hamosu tristeza ba timoroan tomak no mundu internasionál. Maibé lei ne’ebé Estadu Portugal aprova iha tempu ikus ne’e la’ós tanba problema iha Fátima, mas diskusaun ne’e Governu Portugal halo kle’ur ona foin mak hetan aprovasaun.

“Ita hatene katak semana kotuk vizita Ministra Justisa Portugal ninian, enkontru ho Prezidente Repúblika no Primeiru-Ministru afirma katak lei ne’e sira debate kle’ur ona atu kontrola imigrante estranjeiru ne’ebé tama iha espasu Portugés nian ba servisu, ne’ebé laiha relasaun ho problema ne’ebé akontese iha Fátima,” Governante ne’e tenik.

Tanba ne’e, Governu Timor-Leste kontaktu ona ho Embaxadór iha Portugal atu haree didi’ak kona-ba lei foun ne’ebé Portugal aprova nia mekanizmu implementasaun oinsa, sei fó tempu ba timoroan sira ne’ebé laiha vistu traballu ne’e sei hela ka ou deporta iha tempu besik.

Notisia relevante:MNEK: konfrontu iha Fátima Portugál hatun imajen Timor-Leste iha mundu

Jornalista: Hortencio Sanchez

Editór: Florencio Miranda Ximenes

iklan
iklan

Leave a Reply

iklan
error: Content is protected !!