Janeiru-juñu: Servisu Saúde Manufahi rejista dengue 29
DILI, 13 juñu 2024 (TATOLI)–Diretór Servisu Saúde munisípiu Manufahi (SSM), Victor Martins, hateten husi janeiru to’o juñu ne’e, servisu saúde Manufahi rejista moras dengue hamutuk 29 ne’ebé maioria konsideradu kazu importadu.
“Ita iha kazu dengue, ita rejista to’o semana kotuk iha 29. Balun transfere ba iha ospitál referénsia mak foin deteta dengue. Afetadu ba dengue ne’e kazu mate laiha,” nia hateten ba Agência Tatoli, hafoin partisipa iha semináriu “Stakeholder Consultive Workshop for validation of vulneravelity and adaptation assesmente and climate anda health risk profile for Timor-Leste”, durante loron tolu hodi halo validasaun ba dadus perfil risku klima no saude no relatóriu Vulnerabilidade no Avaliasaun iha munisípiu hotu-hotu, iha Delta Nova.
Nia dehan, iha Same no Fatuberliu ne’e kazu dengue importadu, Alas mak kazu lokál no Turiskai mak iha kazu dengue 0.
“Iha mos balun ita konsidera la’ós moras dengue iha fatin, maibé importadu liuliu sira ida-ne’ebé mai vizita Dili, entaun hetan infesaun iha Dili, fila ba munisipiu kauza ba isin manas. Entaun, ita detekta ida-ne’e kazu importasaun barak. La’ós lokál, maibé barak liu ema ne’ebé vizita ba munisipiu seluk, liuliu Dili ne’e mak kuandu fila ba sempre hetan dengue,” nia dehan.
Atu kombate dengue primeiru halo promosaun no avizu sira iha fatin públiku no lori brosura sira hodi hatudu ba populasaun kona-ba moras dengue fó risku ba ema-nia vida, se laiha atensaun mak bele hakotu ema-nia vida.
Iha parte balun, servisu saúde munisípiu Manufahi hato’o ba autoridade munisipiu katak dalan konbate dengue efetivu liu mak halo limpeza jerál, entaun autoridade munisipiu mós orienta ona bazeia ba preokupasaun ne’e no implementa lei númeru 33 kona-ba ordem públiku.
Atividade ne’e kada sesta-feira, munisipiu Manufahin sempre halo limpeza jerál. Alende ne’e hosi saúde fó hanoin ba populasaun kolleta lixu sira-ne’ebé sai susuk nia moris fatin tenke destroe, sunu no hakoi.
Diretór ne’e hateten atu kombate moras dengue, servisu saúde mós distribui abate ba populasaun hodi bele tau iha tanke bee iha uma no halo fomigasaun ba pasiente sira-ne’ebé hetan moras dengue.
“Abate ita fahe ba uma kain balun ne’ebé uza bee tanke ba haris fatin no uma kain sira-ne’ebé afetadu moras dengue ita halo fumigasaun foku ba área afetadu,” nia dehan.
Jornalista : Jesuína Xavier
Editór : Cancio Ximenes
