iklan

EKONOMIA, BOBONARO, HEADLINE, MUNISÍPIU

BNCTL instala sistema POS iha Hali-Mesak

BNCTL instala sistema POS iha Hali-Mesak

Kompañia lokál Maphil Unipesoál Lda halo hela atendimentu finanseira ba kliente Banku Nasionál Komersiu Timor-Leste (BNCTL sigla Portugués) Liuhusi sistema Point Off Sales (POS) ne'ebé eziste iha área Hali-Mesak, aldeia Anahun, suku Odomau, postu Administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 19 juñu 2024 (TATOLI) — Banku Nasionál Komérsiu Timor-Leste (BNCTL, sigla portugés) iha loron 14 fulan-marsu liubá instala ona sistema banku venda ka Point Off Sales (POS) iha Hali-Mesak, aldeia Anahun, suku Odomau, postu administrativu Maliana, munisípiu Bobonaro.

Sistema ne’e instala liu husi parseria entre BNCTL ho kompañia lokál Mapihl Unipesoál lda ho objetivu atu fasilita kliente sira halo levantamentu finanseira besik liután.

Enkuantu sistema ne’e sei halo atendimentu kobre kliente sira husi postu administrativu Bobonaro, Lolotoe, Maliana balun no postu administrativu Cailaco balun.

Notísia relevante: BNCTL sei instala mákina ATM iha Bobonaro

“Instalasaun mákina ne’e atu hakbesik liu servisu finanseira ba komunidade, duké sira halo levantamentu dook, gasta tán osan barak perde tempu no balun bele dezastre tán iha dalan, entaun ho mákina ne’e bele atende ona komunidade barak, funsionáriu sira públiku, veteranu, idozu no bolsa da mãe hotu kedas,” Diretór Kompañia Mapihl Unip Lda, Francisco da Cruz, informa ba Tatoli, iha Hali-Mesak, kuarta ne’e.

Postu venda iha Hali-Mesak ne’e halo atendimentu ba kliente sira-ne’ebé adere ona ba sistema P24 ho kartaun Automatic Teller Macine (ATM) husi BNCTL, Banku Nasionál Ultramarinu (BNU) eseptu Banku Repúblika Indonézia (BRI, sigla indonézia).

“Sira bele mai halo levantamentu iha-ne’e, kualkér oras bainhira presiza bele mai, ha’u husu ba komunidade hotu seidauk asesu informasaun, ba oin bele mai halo levantamentu iha-ne’e no karik sira-ne’ebé foti ona bele fo hatene malu ba,” nia fó hanoin.

Komunidade postu Bobonaro, Carlito Moniz Perreira, sente kontente no konsidera ho instalasaun sistema ne’e hafasíl sira asesu servisu finanseira besik liután.

“Ami fulan-fulan ne’e ba foti osan iha Maliana de’it, agora mákina ne’e iha ona, bele ajuda ona ami, la presiza la’o dook no ba forma naruk, ne’ebé ami agradese tebes tanba durante ne’e atu foti saláriu ami husi Bobonaro ba to’o Maliana, tenke gasta tán osan $10 ou $20,” nia katak.

Nia rekomenda ba BNCTL atu instala tán sistema ne’e iha postu administrativu Bobonaro.

“Ami iha Bobonaro ne’e udan agora, biasa dalan iha Oe-leu ne’e aat, labele liu ba mai, entaun fulan to’o hakarak ka lakohi kondisaun la di’ak mós ami tenke ba de’it ona tanba nesesidade,” nia hateten.

Enkuantu foin lalais ne’e kompania lokál Mapihl Unip Lda mós asina ona akordu ho BNCTL atu sai ajente banku iha Hali-Mesak hodi halo atendimentu finanseira ba kliente sira-ne’ebé atu kréditu no seluk tán.

Notísia relevante: BNCTL Komprometidu Atu Dijitaliza Aan

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!