Komisaun A rekomenda Governu trata Ataúro hanesan zona espesiál
DILI, 20 juñu 2024 (TATOLI)—Komisaun A trata asuntu Justisa no Konstituisionál iha Parlamentu Nasionál (PN), rekomenda ba Governu atu trata Ataúro hanesan zona espesiál.
“Rekomenda ba Governu atu trata Ataúro hanesan zona espesiál, tanba Ataúro iha estatutu espesiál própriu,” refere relatóriu fiskalizasaun komisaun A ne’ebé Agência Tatoli asesu, kinta ne’e.
Iha fulan-maiu, tuir relatóriu, Komisaun A hala’o vizita fiskalizasaun ba autoridade administrativa Ataúro ne’ebé lideradu husi Vise Prezidente Komisaun A, António Verdiál de Sousa, akompañadu husi Deputadu membru komisaun ne’ebé hala’o atividade inisiál hala’o reuniaun ho xefe suku no komunidade Makadade kona-ba karta reklamasaun indemizasaun ba plantasaun, husi kompañia Paul Ekric Jv Nekar Unipesoál, Lda.
Tanba, relatóriu ne’e haktuir, iha lamentasaun husi komunidade afetadu husi projetu kontrusaun ne’ebé komesa iha tinan 2023, maibé to’o agora laiha konsiderasaun husi parte autoridade ho kompañia.
Xefe suku ho komunidade sira sente afetadu no presiza desizaun husi nível altu, tanba la rona indemnizasaun husi kompañia ba komunidade afetadu, nune’e komunidade husu komisaun atu analiza no akompaña prosesu justisa iha Timor-Leste.
Enkuantu, atividade komisaun nian iha vizita fiskalizasaun ba autoridade administrativa Ataúro hasoru malu halo reuniaun ho autoridade no xefe suku sira hotu. Iha enkontru ne’e, autoridade no líder komunitáriu sira hato’o katak situasaun munisípiu Ataúro la’o ho di’ak, maibé hato’o mós katak kondisaun ne’ebé munisípiu hasoru mak kondisaun problema infraestrutura bázika haensan estrada ladi’ak, susar asesu ba rede telekomunikasaun, falta rekursu umanu no funsionáriu.
Nune’e, komisaun rekomenda ba Ministériu Obra Públika (MOP) atu haree urjénsia estrada ligasaun entre Ataúro Villa ho suku Makadade, tanba kondisaun estrada ladi’ak.
Rekomenda mós ba MOP atu haree urjénsia problema rede telekomunikasaun ba komunidade iha suku Makadade, no husu atu tau atensaun ba komunidade suku Makadade la asesu ba bee-moos.
Aleinde ne’e, rekomenda ba komisaun espesializada permanente iha Parlamentu Nasionál (PN) atu halo vizita fiskalizasaun iha munisípiu Ataúro.
Jornalista : Nelson de Sousa
Editór : Cancio Ximenes
