HNGV hahú reabilita edifísiu servisu atendimentu saúde ba pasiente sira
DILI, 24 Juñu 2024 (TATOLI)– Diretora Ezekutiva Ospital Nasionál Guido Valadares (HNGV), Cecilia Barros Mendonça, informa, HNGV hahú reabilita edifisíu ba servisu atendimentu hosi profisionál saúde ba pasiente sira durante vizita Papa Farncisco nian iha Timor-Leste iha fulan-setembru.
“Ministériu Saúde ho HNGV agora prepara prepara fatin ne’ebé dadaun konstrusaun (reabilitasaun) la’o hela ba fulan rua nian,” Diretora Ezekutiva Hospital Nasionál Guido Valadares (HNGV), Cecilia Barros Mendonça, hato’o ba jornalista sira liuhosi konferénsia imprensa iha HNGV, Bidau, segunda ne’e.
Ministériu Saúde ho Hosipitál Nasionál Guido Valadares (HNGV) sei preparadu, bainhira Amu Papa sei mai halo vizita pastorál iha Timor-Leste.
Nia dehan, edifísiu sira-ne’ebé reabilita mak edifísiu antigu-admistrasaun HNGV nian ne’ebé daudaun ne’e la’o hela iha reabilitasaun.
Ekipa delegasaun vatikanu vizita ona fatin iha HNGV no haree dezeñu preparasaun ba reabilitasaun no konkorda ba planu no dezeñu sira.
“Ekipa avansadu hosi Roma mai ona dala-rua hodi haree kondisaun no preparasaun HNGV nian. Primeiru sira mai haree fatin no segundu sira mai haree preparasaun saida de’it mak HNGV iha. Preparasaun momentu ne’ebá mak fatin no ami halo dezeñu no hatudu ba team avansadu no sira aseita,” nia hateten.
Husu kona-ba obra reabilitasaun edifísiu atinje ona porsentu hira, diretora responde, seidauk bele fó resposta tanba konstrusaun ba obra ne’e foin hahú semana ida maibe HNGV prepara kondisaun no rekusu hotu hodi profisionál saúde sira bele halo atendimentu ba ema.
Jornalista : Jesuína Xavier
Editór : Cancio Ximenes
