iklan

EKONOMIA, HEADLINE, MUNISÍPIU, OÉ-CUSSE (RAEOA)

Autoridade hadi’a tán irrigasaun ba natar ektare 15 iha Lalisuk

Autoridade hadi’a tán irrigasaun ba natar ektare 15 iha Lalisuk

Autoridade RAEOA liuhusi Sekretária Rejionál ba Asuntu Agrikultura, hadi’a tán irrigasaun atu fasilita bee ba natar ektare 15 iha natar Oénitas B pertense ba suku Lalisuk, sub-rejiaun Pante Makasar. Imajen Tatoli/Abílio Elo Nini.

OÉ-CUSSE, 24 juñu 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhusi Sekretária Rejionál ba Asuntu Agrikultura, hadi’a tán irrigasaun atu fasilita bee ba natar ektare 15 iha natar Oénitas B, pertense ba suku Lalisuk, sub-rejiaun Pante Makasar.

Notísia relevante: Autoridade solusiona bee ba natar ektare 40 iha Lifau 

Julio da Costa, nu’udar responsável ka P3A, informa, natar Oénitas B ektare 15 kada tinan halai inklui natar sira iha Tetumnanu parte kraik, tinan kotuk la halai natar tanba bee la sufisiente, tan ne’e agrikultór sira hato’o pedidu ba autoridade atu apoia, tanba kanu di’ak hela.

“Maibé Ohin ami agradese tanba ami-nia pedidu responde no ohin bele mai iha-ne’e, haruka eskavadór no loader mai atu loke tán bee dalan husi mota hodi aumenta tán, entaun ami bele halai natar tanba nia fulan atu halai mak ida-ne’e,” Júlio da Costa, ko’alia iha natar Oénitas, suku Lalisuk.

Agirukultór ne’e mós, informa kona-bá natar sira iha Oénitas A hamutuk ektare 27 abandona tinan tolu ona dezde 2021 to’o daudaun tanba laiha maske irrigasaun iha hela.

“Tinan tolu ona ami la halai difikuldade mak bee, bee ne’e tuir loloos mai husi irrigasaun Tono, maibé to’o ohin loron ami la halai tanba bee husi Tono mai to’o parte leten maluk sira iha ne’ebá, taka metin bee ne’e, la to’o ami iha kraik, ne’e mak bee la sufisiente,” nia katak.

Natar na’in João da Cunha, agradese ba Governu tanba bele apoia natar na’in-sira atu labele abondona tán, hafoin abondona tinan tolu ona ho razaun bee laiha.

“Ami preokupa mak bee de’it tanba la sufisiente, agora ami ne’ebé atu serbisu daudaun ami hamutuk na’in-41no iha natar Oénitas hamutuk na’in-56 tinan tolu ami la halai tanba bee mak laiha,” nia dehan.

Iha biban ne’e, Sekretária Rejionál ba Asuntu Agrikultura Floresta no Pekuária, Filomena Sila, fó sai apoia ne’e, tanba serbisu hamutuk ho Ekipa Institutu Jestaun Ekipamentu (IGE, sigla portugés) mak apoia fasilidade atu atende pedidu ne’ebé hato’o husi komunidade sira liuhusi autoridade lokál sira husu apoia.

“Tán ne’e mak ohin ami mai fatin ne’e hodi haree no akompaña eskavadór no loader ne’ebé mai ona, atu responde pedidu ne’ebé husi suku Lalisuk hato’o mai ami, ohin loron sei realiza no mós sei loke bee dalan hodi tama ba iha natar ektare 15, nune’e natar na’in-sira bele halai ona natar ba tinan ne’e,” nia akresenta.

Notísia relevante: Autoridade orienta IGE loke bee-dalan ba natar ektare 40 iha Lifau

Antes ne’e Autoridade RAEOA, liuhusi Sekretária Rejionál ba Asuntu Agrikultura Floresta no Pekuária serbisu hamutuk ho Asesór Asuntu Sosiál, orienta IGE, loke bee-dalan fasilita natar ektare 40 iha suku Lifau, sub-rejiaun Pante Makasar. 

Jornalista: Abílio Elo Nini

Editór: Evaristo Soares Martins 

iklan
iklan

Leave a Reply

iklan
error: Content is protected !!