Reprezentante povu kontinua husu ME tau atensaun ba problema menus profesór
DILI, 25 juñu 2024 (TATOLI)—Membru Parlamentu Nasionál (PN), liuhusi Deputadu PLP, Helder Freitas, husu ba Ministériu Edukasaun (ME) atu tau atensaun ba problema menus profesór iha dixiplina balun iha eskola balun iha Baucau.
Notísia Relevante: PN aprova rezolusaun-rekomenda Governu solusiona problema antigu profesór kontratadu
“Iha eskola sekundária jerál munisípiu Baucau, postu Quelicai-Laisorulai sei menus profesór mateira 10-resin mak la hanorin no iha de’it totál profesór iha na’in-tolu (3) de’it, alunu iha na’in-125,” nia levanta iha reuniaun plenária Parlamentu Nasionál, tersa ne’e.
Nia dehan, PN rasik aprova ona rezolusaun kona-ba profesór kontratadu ni’an ho unanimidade hodi fó solusaun ba preokupasaun ne’ebé iha, maibé prosesu implementasaun seidauk hatene.
Deputadu FRETILIN, Antoninho Bianco ho Deputadu KHUNTO, Antonio Verdiál de Sousa, kontinua husu ME atu implementa rezolusaun PN hodi solusiona problema antigu profesór sira.
Reprezentante Governu liuhusi Sekretária Estadu Igualidade (SEI), Elvina de Sousa, hato’o katak andamentu ba rezolusaun PN nian kona-ba profesór kontratadu sira, ba daudaun ne’e ME tenta implementa ona ka fó resposta ba rezolusaun ne’e liuhusi fó bolsa kandidatu ba profesór ba ema hotu inklui ba antigu profesór kontratadu sira atu bele mós ba kompete.
Notísia Relevante: ME loke vaga bolsa kandidatu profesór faze daruak presiza manorin 800
Jornalista : Nelson de Sousa
Editór : Cancio Ximenes
