Janeiru-maiu: Bebé moris iha Aileu hamutuk 442 no na’in-9 mate

DILI, 27 juñu 2024 (TATOLI)–Diretór Servisu Saúde munisípiu Aileu (SSA), João de Jesus, hateten husi janeiru no maiu ne’e, bebé ne’ebé moris iha sentru no postu saúde Aileu ne’e hamutuk 442 no na’in sia (9) mate.

Nia hateten, husi totál ne’e bebé ne’ebé moris iha postu saúde Aileu Vila ne’e hamutuk 228,, iha postu saúde Remexio ne’e iha bebé hamutuk 126, iha postu saúde Laulara hamutuk 52 no postu saúde Lequidoe ne’e bebé hamutuk 36.

“Husi totál númeru ne’e kompostu hosi bebé mane hamutuk ema na’in-235 no bebe feto hamutuk ema na’in-207, Nune’e, dadus bebé moris hosi fulan-janeiru to’o maiu 2024 ne’e bebé moris iha Aileu hamutuk 442,” Diretór Servisu Saúde munisipiu Aileu, João de Jesus, hatete ba Agência Tatoli liuhusi WhatsApp (WA), kinta ne’e.

Aleinde ne’e, nia dehan, husi dadus natalidade ne’e iha mos dadus mortalidade perinatal ne’e iha bebé hamutuk na’in-sia (9) ne’ebé kompostu husi bebé-mane ema nain-haat (4) no bebé-feto hamutuk ema na’in-lima (9).

Diretór ne’e esplika, bebé na’in-sia (9) ne’ebé mate ne’e, tanba iha komoplikasaun barak  bainhira sira moris mai, tanba iha bebé balun moris mai mate tiha ona iha nia inan kabun laran.

“Inan sira hetan hemorajia, bebé moris mai ho Asphixia, partus komplikada,” nia esplika.

Jornalista : Jesuína Xavier 

Editór        : Cancio Ximenes