Autoridade identifika ona rai atu harii Postu Polísia iha merkadu Maliana
BOBONARO, 02 jullu 2024 (TATOLI) – Governu lokál liuhusi Administradór Postu Administrativu Maliana, Augusto Caetano, hamutuk ho Diresaun Terra Propriedade Munisípiu Bobonaro, tersa ne’e tún direita ba terrenu hodi halo identifikasaun ba rai estadu ne’ebé atu harii postu Polísia iha árreadór merkadu sentrál Maliana.
Administradór postu administrativu Maliana, Augusto Caetano, hateten planu establese postu Polísia ne’e atu fó seguransa ba negosiante lokál no estranjeiru sira bele halo atividade negósiu iha merkadu Maliana ho seguru no livre.
Autoridade postu administrativu Maliana ne’e esplika, postu polísia ne’e sei konstrui ho kontribuisaun osan husi negosiante lokál no estranjeiru sira-ne’ebé halo negósiu iha merkadu Maliana, tanba durante ne’e sira sente la seguru liuliu iha tempu kalan.
Notísia relevante: Presu nesesidade bázika iha merkadu Maliana normál
“Ita haree durante ne’e ba merkadu Maliana, iha kalan no loron bazar, sempre akontese hela de’it problema, tuda-malu hodi provoka atu na’ok, entaun ha’u hanesan administradór postu hakarak ha’u-nia komunidade ka negosiante sira-ne’e, atu asegura seguransa ba sira nia-an, ba sira-nia sasán sira iha merkadu,” nia ko’alia iha kapitál Maliana, tersa ne’e.
Diretór Jestaun Merkadu no Turizmu, Paulo dos Santos, agradese no konsidera insiativa negosiante sira-nia ne’e bele apoia no implementa planu ne’ebé trasa ona durante ne’e.
Diretór ne’e hatutan, iha tempu badak nia parte sei halo koordenasaun ho Sekretáriu Planeamentu no Dezenvolvimentu Integradu Munisipál, atu haree fila-fali planu mestre ba konstrusaun merkadu Maliana, hafoin halo dezeñu ba postu Polísia ne’ebé bazea ba rekomendasaun husi komandu PNTL munisípiu Bobonaro.
“Ha’u hanoin planu sira-ne’ebé implementa ona, ba oin ami-nia jestór merkadu laran ne’e bele fó apoia informasaun ba malu ho polísia, kuandu akontese ema tuda, ne’e sira bele pasa informasaun ba polísia,” nia katak.
Enkuantu daudaun ne’e Diresaun Servisu Munisipál Jestaun Merkadu Munisípiu Bobonaro koloka jestór merkadu na’in-ha’at mak halo kontrolu ba merkadu Maliana.
Notísia relevante: Negosiante Maliana husu tetu didi’ak bazár movel iha merkadu Mau-Mali no Soso
Jornalista: Sérgio da Cruz
Editór: Evaristo Soares Martins
