iklan

EKONOMIA, HEADLINE, MUNISÍPIU, OÉ-CUSSE (RAEOA)

Presiza halo reabilitasaun ba Sede Suku Costa

Presiza halo reabilitasaun ba Sede Suku Costa

Sede suku Costa iha sub-rejiaun Pante Makasar. Imajen Tatoli/Abílio Elo Nini.

OÉ-CUSSE, 09 jullu 2024 (TATOLI) – Xefe suku Costa, Francisco Colo, propoin ba Autoridade Rejiaun Administrativa Espesiál Oé-Cusse Ambeno (RAEOA), atu halo reabilitasaun ba sede suku Costa, nune’e bele hala’o atendimentu ba komunidade sira ho di’ak.

Notísia relevante: Governu selebra kontratu ho ofisiál apoia suku na’in-72 iha Oé-Cusse

Tuir autoridade lokál ne’e katak, tanba kondisaun sede suku Costa ladún iha espasu hodi akumula pesoál apoia suku na’in-haat inklui seguransa Ofisiál Polísia Suku (OPS).

“Pedidu ne’e ha’u hatama ona, husu atu halo reabilitasaun ba sede suku, la’ós reabilitasaun de’it, maibé ha’u hakarak halo buat foun ida, tanba suku Costa iha sentru kapitál rejionál Oé-Cusse, ne’ebé ha’u presiza fatin ida-ne’ebé bele halo atendimentu dignu ba komunidade sira,” Francisco Colo, ko’alia iha sede Cost sub-rejiaun Pante Makasar, Oé-Cusse, tersa ne’e.

“Ha’u hato’o pedidu sedu tanba husi parte Governu Sentrál halo ona rekrutamentu ema na’in-haat apoia serbisu suku, maibé ami-nia sala la sufisiente, entaun ami labele halo serbisu ho di’ak, aumenta ho seguransa OPS kada loron hala’o serbisu iha suku, entaun iha relatóriu ne’ebé sira sensitivu tenke asegura, ne’e mak ha’u hato’o pedidu ba Autoridade RAEOA husu apoia,” nia katak.

Tanba nia, totál populasaun iha suku Costa hamutuk 15.450 ho totál uma-kain hamutuk 3.435 ho kompozisaun aldeia lima; Sanane, Oésono Mahata, Oétfo no aldeia Lakufoan.

Hatán ba asuntu ne’e, Prezidente Autoridade RAEOA, Rogério Tiago de Fátima Lobato, rekoñese simu ona pedidu husi Autoridade lokál suku Costa nian, ho konteudu atu hadi’ak edifísiu sede suku nian.

“Ha’u simu ona pedidu ne’e atu hadi’a sede suku Costa, ha’u haree ona kondisaun sede suku ne’e rasik, ita sei halo suku Costa sai di’ak uma foun, ne’ebé ha’u sei la haluha pedidu ne’e atu nune’e bele atende ita-nia komunidade suku Costa ne’e ho di’ak,” nia dehan.

Notísia relevante: Suku Costa iha RAEOA estabelese tara-bandu no aplika selu-multa

Jornalista: Abílio Elo Nini

Editór: Evaristo Soares Martins   

iklan
iklan

Leave a Reply

iklan
error: Content is protected !!