SETV vizita ETV Malibaka Yamato Maliana

BOBONARO, 12 jullu 2024 (TATOLI) – Sekretáriu Estadu Ensinu Sekundária no Tékniku Vokasionál, Domingos Lemos Lopes, hamutuk ho ekipa sesta ne’e halo vizita ba Ensinu Tékniku Vokasionál númeru II Malibaka Yamato Maliana, munisípiu Bobonaro hodi observa direita kondisaun infraestrutura eskola no fasilidade sira.

Durante vizita governante ne’e identifika saladeaula barak mak abandona no du’ut mak nakonu, nune’e  orienta ba diresaun servisu munisipál edukasaun atu buka meiu ruma hodi rezolve.

Notísia relevante: Estudante 128 iha ESTV Malibaka Yamato tuir ezame PAP

“Foin primeira vez ha’u mai vizita eskola tékniku vokasionál Malibaka Yamato, ohin mak ha’u foin haree situasaun, kondisaun reál eskola ne’e, klaru observasaun ne’ebé ke ita hotu haree katak iha saladeaula balu mak agora daudaun ne’e la utiliza, tanba ne’e maka ko’alia ona ho señór diretor, superintedente edukasaun no entidade sira hotu atu nune’e prosesu ba oin ne’e saida mak ita atu halo,” nia informa ba jornalista sira hafoin halo vizita.

Nia dehan, iha tinan kotuk Ministériu Edukasaun hasai ona sirkulár ba eskola sira atu redús persentajen taxa matríkula husi ensinu sekundáriu jerál hodi aumenta fali ba ensinu sekundáriu tekniku vokasionál, maibé seidauk másimu tanba presiza tan halo sosializasaun ba inan-aman sira.

Nia husu ba estudante sira atu mai eskola iha eskola tékniku vokasionál Malibaka, tanba eskola ne’e atu prepara ema nia kapasidade intelektuál no abilidade hodi responde merkadu traballu.

“Dalabarak ita dehan eskola tékniku ne’e nia remata labele kontinua eskola, ne’e nia presepsaun salah, ida loos mak eskola tékniku vokasionál ne’e eskola ida-ne’e atu responde ba demanda merkadu, ida parte seluk nia mós bele kontinua ba universidade, tanba ne’e mak Ministériu Edukasaun halo ona negosiasaun maka’as ho UNDIMO nune’e bele fó duplta sertifikasaun ba profesór sira atu profesór sira sertifika fali estudante sira,” nia katak.

Diretor Eskola ETV Malibaka Yamato Maliana, Carlito Graciano, informa saladeaula hamutuk 19 mamuk ka abandona tanba númeru estudante menus.

“Loloos ne’e la abandona, tanba eskola ne’e hahú konverte husi ensinu sekundáriu mai husi ensinu tékniku vaskonal ne’e iha 2017 alunu sei barak, maibé tanba iha-ne’e iha departamentu tolu komérsiu, turizmu no kontablidade, ho razaun matríkula iha eskola Dom Martinho da Costa Lopes ne’e barak liu, entaun minimiza tiha iha-ne’e, atu akumula labarik sira mai eskola iha-ne’e, tanba ne’e distánsia mós dook,” nia katak.

Nia hatutan, ESTV Malibaka Yamato Maliana prontu oferese saladeaula mamuk ba estudante sira husi eskola sira seluk hodi partisipa iha prosesu ensinu no aprendizajen, maibé atu muda eskola ne’e ba fatin seluk dirijente eskola ne’e la konkorda.

Diretór Edukasaun Munisípiu Bobonaro, Miguel Freitas, esplika, iha tempu badak sei tuur hamutuk ho parte relevante sira hafoin foti desizaun ida-ne’ebé di’ak hodi bele koloka estudante sira hala’o enisnu no aprendizajen iha aula mamuk hirak-ne’e.

“Ami iha planu tanba iha hanoin ida husi komunidade, liuliu xefe suku sira, ne’ebé ba oin ami sei tuur hamutuk la’ós dehan ami atu foti desizaun ona, maibé ami sei konsulta ba malu oinsá atu hetan solusaun ne’ebé hotu-hotu bele asesu,” nia katak.

Enkuantu daudaun ne’e Ministériu Edukasaun loke ona konkursu públiku ba kompañia sira atu konstrui moru protesaun ba Ensinu Tékniku Vokasionál Malibaka Yamato Maliana ne’ebé hetan estragu iha tinan hirak liubá.

ETV Malibaka Yamato Maliana akumula estudante hamutuk 280 mai husi departamentu turizmu, kontablidade no komérsiu, ho totál profesór na’in-26.

Notísia relevante: ME sei konstrui-reabilita eskola 15 iha Bobonaro inklui EBC Tapo

Jornalista: Sérgio da Cruz
Editór: Evaristo Soares Martins