DILI, 19 jullu 2024 (TATOLI)—Banku Sentrál Timor-Leste, (BCTL, sigla portugés), sesta ne’e, halo ona lansamentu ba mákina rua ho objetivu atu fasilita públiku ne’ebé hakarak atu troka osan tahan ba moeda sentavu Timor-Leste.
Governadór BCTL, Helder Lopes, hateten, inisiativa hamosu mákina ne’e tanba dalabarak negosiante kiik no estudante sira hakarak troka sira-nia osan tahan ba moeda tenke mai forma no hein kleur mak foin troka osan.
“Ita iha osan tipu rua mak notas no besi, dalabarak ita-boot sira atu mai troka osan besi tenke hein kleur mak foin troka. Maibé ohin ita lansa ona mákina rua, ida-ne’e imi la presiza mai tan ona iha BCTL laran hodi hein troka osan tahan ba besi, maibé ita-boot sira bele bá de’it mákina sira ne’e bele troka ita boot sira-nia osan,” Helder Lopes, dehan iha resintu BCTL.
Governadór konsidera, ho estabelesimentu mákina ne’e maka banku presta tan servisu di’ak ba sidadaun sira.
Notísia relevante : Xefe Governu orienta BCTL halo kampaña sensibilizasaun kona-ba moeda falsa
Iha fatin hanesan, Vise-Governadór BCTL, Sara Lobo Brites, hateten, Banku Sentrál identifika tan ona fatin rua hodi bele estabelese mákina.
“Fatin ne’e iha Becora no fatin ida tan. Ita haree fatin sira ne’ebé atividade negósiu barak iha tempu badak sei monta tan,” akresenta.
Biban ne’e, nia esplika, ba sidadaun estranjeiru ne’ebé atu mai Timor-Leste maibé sei konfuzaun troka osan, daudaun seidauk iha fasilidade atu troka osan husi nasaun sira seluk ne’ebé la’ós uza dolar amerikanu, maibé iha dalan ninin iha sidadaun balun ho inisiativa rasik kaer osan husi nasaun seluk bele troka iha sira.
“Posibilidade iha futuru ita mós bele estabelese fatin sira ne’ebé bele halo atividade troka osan, maibé ha’u hanoin estranjeiru ne’ebé sira hakarak mai ita-nia rai hatene ita uza dolar amerikanu ne’ebé la problema ba estranjeiru sira,” nia tenik.
Jornalista : Arminda Fonseca
Editora : Julia Chatarina