DILI, 26 Jullu 2024 (TATOLI) – Agrikultór sira iha Betano, postu administrativu Same, munisípiu Manufahi, ezije ba Governu atu hadi’a irrigasaun Karau-Ulun ne’ebé danifika durante tinan 10-resin, nune’e bele distribui bee ba natar kuaze ektare rihun 17 ne’ebé abandonadu.
Portavós agrikultór Betano, João Belo, dehan sira-nia moris depende tebes ba to’os no natar, tanba ne’e husu ba Governu tau prioridade ba halo manutensaun ba irrigasaun ne’e.
“Ami povu ki’ik ne’e, natar mak asegura ami-nia vida ba tinan naruk, hahú kedan husi ami-nia avó sira mai to’o ohin loron hatutan nafatin ba jerasaun foun sira. Tanba ne’e, ami husu ba Governu atu kontinua tau prioridade ba irrigasaun mota Karau-Ulun atu ami bele hetan fali fornesimentu bee hodi halai fali ami-nia natar sira”, João Belo hateten iha konferénsia imprensa ne’ebé hala’o iha Bidau, ohin.
Tuir nia, irrigasaun Karau-Ulun ne’e daudaun rai-henek no fatuk maka nakonu iha laran. Tanba ne’e, portavós husu ba Ministériu Agrikultura, Pekuária, Peska no Floresta (MAPPF) atu tau konsiderasaun ba asuntu ida ne’e.
Durante ne’e, agrikultór sira iha Betano uza rai natoon hodi kuda fali ai-han sira iha to’os laran hodi sustenta família. Tanba ne’e, sira halibur malu hodi husu Ministériu Agrikultura atu responde ba ezijénsia sira ne’e.
Reprezentante komunidade agrikultór Betano ne’e solisita ba Governu, bainhira atu hadi’a irrigasaun ne’e no loke konkursu tenke haree kapasidade empreza konstrutura ida di’ak, tanba antes ne’e, iha empreza estranjeira ida mak konstroi, maibé laiha kualidade nune’e mota sobu tiha.
Iha sorin seluk, Diretór Nasionál Irrigasaun MAPPF, Jacinto Gama, esklarese katak problema irrigasaun iha mota Karau-Ulun ne’e sei hein prosesu atu halo konstrusaun, maibé alternativa ne’ebé diresaun halo ona ho komunidade agrikultór iha Betano maka fornese ona bee ba sira iha tinan kotuk.
“Iha tinan kotuk ami bá nornaliza ona mota Karau-Ulun no hatama ona bee ba natar komunidade nian no eskapadór ida preparadu ona iha mota Karau-Ulun ne’ebá. Komunidade sira dehan sira kuda ona ai-horis balun, entaun planu kuda haree ne’e hela ba tinan 2024”, dehan.
Daudaun, diresaun hein hela proposta husi agrikultór sira ne’ebé prontu atu halai natar, atu diresaun bele apoia mákina ba mota Karau-Ulun, maibé to’o agora seidauk iha komunidade ida maka hato’o sira-nia pedidu.
“De repente rona sira halo fali konferénsia imprensa ne’e ho razaun saida? Presiza atu klarifika, tanba tinan ne’e diresaun prontu atu apoia sira”, nia kestiona.
Notísia relevante: Rai ektare rihun 17 iha Manufahi la utiliza ba atividade agríkola
Jornalista: Tomé Amado
Editora: Maria Auxiliadora
