VIQUEQUE, 06 agostu 2024 (TATOLI)- Sekretáriadu Tékniku Administrasaun Eleitóral (STAE) nasionál, tersa ne’e, hahú sosializa resenseamentu eleitorál ho sistema biométriku ba diretór servisu munisipál no autoridade lokál sira molok implementa.
Sosializasaun ne’e realiza ho tema, “Sistema informasaun resenseamentu eleitorál ho baze biométriku”.
Tuir Diretór STAE munisípiu Viqueque, Humberto Fernandes, sosializasaun ne’e fó prioridade uluk ba diretór munisipál no autoridade sira atubele kompriende kona-ba implementasaun sistema resenseamentu biométriku tanba sistema ne’e foun presiza introdús ba entidade sira.
“Tanba ne’e, ita-nia diretór STAE Jestaun Baze dadus mai halo sosializasaun ba ita-nia diretór no autoridade sira. Nune’e, ha’u husu diretór no autoridade sira partisipa tanba faz parte husi STAE, atu lori Viqueque ba oin liuhusi ita-nia serbisu hamutuk hodi espalla informasaun sosializasaun sira-ne’e ba ita komunidade sira”, Humberto Fernandes, hateten ba jornalista sira, iha edifísiu STAE Viqueque, ohin.
Diretór SATE munisípiu Viqueque ne’e afirma, liuhusi sosializasaun ida-ne’e hodi bele promove liután informasaun ba família no sosiadade Viqueque tanba tempu badak STAE sei implementa sistema baze dadus biométriku.
“Ha’u fiar katak ema bele hatene ninia prosesu no regra sira, atu bele partisipa iha resenseamentu eletorál. Iha tempu-badak munisípiu Viqueque sei lansamentu ba sistema biométriku nune’e sei target (alvu) ba uluk funsionáriu no veteran,” nia akresenta.
Nia dehan, ba oin programa sosializasaun sistema biométriku referidu, STAE planu ona sei realiza iha kada postu administrativu sira, atu oferse ba komunidade sira.
Reprezentante Prezidente Autoridade munisípiu (PAM) Viqueque, Luis Antonio da Silva Soares, haktuir, sosializasaun ne’e importante tanba ne’e presiza atensaun másimu, komprende sistema Biométriku tanba sistema ne’e foun ba eleitór sira.
“Liuhusi sosializasaun ida-ne’e autoridade no diretór sira tenke habelar informasaun sira-ne’e ba ita-nia komunidade sira. Nune’e, komunidade sira bele kompriende sistema biométriku tanba sistema ida-ne’e mak agora atu implementa iha ita-nia nasaun Timor Leste,” nia hato’o.
Iha oportunidade ne’e, Reprezentante Komisaun Nasionál Eleisaun (CNE, sigla portugés) Viqueque, Armanda S. Tolentino, hateten, órgaun independente no STAE maka administra ba eleisaun liuhusi sitema foun ida-ne’e maka sei aplika iha eleisaun sira tuirmai.
“Sistema resenseamentu ne’e sai importante, ita hahú uluk ida-ne’e, hafoin ita tama ba prosesu eleisaun. Ha’u espera liuhusi sosializasaun ida-ne’e bele la’o ho di’ak hodi ita hatutan ba ita-nia komunidade sira iha baze,” nia tenik
Entretantu, sosializasaun ne’e oferese husi Diretóra STAE nasionál Jestaun Baze Dadús, Tulia O. Andrade de Jesus no hetan partisipasaun husi diretór munisipál, diretór liña ministeriál no xefe suku husi suku 10 iha postu Viqueque Vila no administradór postu Viqueque Vila no segundu komandante Polísia Nasionál Timor Leste (PNTL) munisípiu Viqueque.
Jornalista: Vitorino Lopes da Costa
Editór : Rafael Ximenes de A. Belo
