VIQUEQUE, 08 agostu 2024 (TATOLI)-Autoridade munisípiu Viqueque liuhusi komisaun organizadora ne’ebé estabelese, foin rejista sarani peregrinu hamutuk na’in-1.900 ba partisipa misa hosi papa Francisco, iha Tasi-tolu, Dili.
Tuir Prezidente Autoridade munisípiu (PAM) Viqueque, Francisco C.S de Gonzaga Soares, preparasaun vizita papa Francisco ba munisípiu Viqueque antes ne’e forma ona komisaun nune’e distribui ona lista rejistrasaun ba kada postu sira hodi rejista peregrinu sira, maibé rezultadu rejistu númeru ki’ik tebes.
“Loloos ne’e númeru sarani atu ba partisipa misa ne’e 13 mil, maibé Viqueque foin 1.900. Tanba ne’e, ha’u husu ba administradadór postu sira esforsu aan hahú aban (sesta) serbisu maka’as hodi kordena ho amu parókia sira kontinua rejistu tanba ita maka sarani katóliku, pelumenus númeru sarani 10.000 maka ba partisipa misa,” Francisco C.S de Gonzaga Soares, hateten ba Agência TATOLI, iha salaun administrasaun Viqueque, ohin.
Tuir dadus provizóriu pregrinu kada postu administrativu husi postu Ossú hamutuk na’in-460, Uatucarbau na’in-120, Uatulari na’in-850, Lacluta 270 no rejistasaun pregrinu husi parókia Viqueque Vila hamutuk 200.
“Dadus pregrunu husi postu Viqueque Vila maka seidauk aprezenta númeru peregrinu ba komisaun organizadora. Nune’e ha’u husu administradór Viqueque Vila no xefe suku sira tenke esforsu rejistu, karik hasoru difikuldade ruma tenke relata ba komisaun. Atu tama loron 15 fulan-agostu ne’e iha ona komisaun nia lima hodi aprezenta ba Dioseze Baucau no komisaun bele prepara transporte ba pregrinu sira,” autoridade ne’e hato’o.
Autoridade ne’e fó hanoin ba autoridade sira katak amu papa sai hanesan aman ba sarani Katólika tomak nune’e presiza sarani Katólika sira-nia presenza iha momentu selebrasaun misa.
Nune’e nia dehan, ba preparasaun buat hotu komisaun responsavél hanesan hahan, transporte no kamizola munisípiu Viqueque simu 45 mil hodi distribui ba sarani sira husi postu lima.
Iha fatin hanesan, Administradór Postu Uatucarbau, Anacleto Doutel Sarmento, haktuir, númeru pregrinu husi postu Uatucarbau ki’ik tanba difikuldade foto sarani sira-nian tanba ne’e maka sarani sira barak la rejistu.
“Iha postu Uatucarbau ema fase foto mós laiha, nune’e sarani sira labele rejista tanba iha kritéria tenke aprezenta foto kloridu 3×4. Ho Ida-ne’e maka sai obstakulu ba sarani sira, maibé ohin PAM dehan sei koordena nasionál, hodi halo konfirmasaun, atu labele uza foto ba prosesu rejistu. Ha’u sente sarani barak maka sei partisipa,” nia realsa.
Enkuantu, sorumutu ne’e, PAM Viquque halibur kada seksaun sira hodi rona direta ba preparasaun munisípiu Viqueque, hetan partisipasaun husi administradór postu lima, diretór munisípiu, amu parókia sira iha munisípiu Viqueque.
Jornalista: Vitorino Lopes da Costa
Editór : Rafael Ximenes de A. Belo
