BOBONARO,08 agostu 2024 (TATOLI) – IX Governu Konstituisionál liuhosi ministériu kompetente presiza tau prioridade hodi kontinua planu atu halo konstrusaun jardín rezisténsia Nino Konis Santana iha Foho Loe-Laco nia hún ne’ebé lokaliza iha suku Atudara, postu administrativu Cailaco, munisípiu Bobonaro.
Asuntu ne’e relata husi Veteranu hosi Cailaco, Alfredo Moniz da Costa kódigu ‘Busa Dani’ durante halo diálogu ho Prezidente Autoridade Munisipál Bobonaro, Alexandrino Pires, iha Poerema, aldeia Liabote, suku Meligo, postu administrativu Cailaco, munisípiu Bobonaro.
Busa Dani, hateten iha mandatu governu anteriór lideradu Primeiru Ministru, Taur Matan Rauk, liuhosi Konselu Administrasaun Fundu Infraestrutura aprova ona orsamentu no asina ona plaka iha Foho Loe-Laco nia hún atu hari jardín rezisténsia.
Enkuantu Arkivu Muzeu Rezisténsia Timorense (AMRT) mós halo ona diálogu ho autoridade munisípiu Bobonaro,veteranu no líder komunitária postu administrativu Cailaco hodi konsulta kona-bá dezeñu integradu jardín rezisténsia Nino Konis Santana.
Notísia relevante: CCLN husu Governu dezenvolve abrigu Nino Koni Santana iha Foho Loe-Lacu
“Projetu ne’e hatama tiha ona, veteran-sira maka propoin, uluk aprova orsamentu halo komunidade mai lere to’o ba foho, maibé to’o agora governu ida tún no ida sa’e la realiza, tanba ne’e mak ha’u atu rekomenda de’it katak governu ida-ne’e keta haluha,” veteran ne’e fó hanoin.
Tuir nia, governu presiza dezenvolve no transforma fatin ne’e sai sítiu turizmu istóriku, tanba períodu rezisténsia fatin sai sai hanesan baze konsetransaun FALINTIL.
Enkuantu fatin ne’e mós dezde tempu koloniál portugés, bei-ala sira uza ba subar hodi rejiste kontra malae mutin-sira.
Veteranu Busa Dani konsidera fatin ne’e kontribui maka’as ba luta libertasaun nasionál, tanba iha fulan-outubru 1994 Komandante Vicente ‘Roque’ ho komandante ‘Hakiak’ no seluk tán lori Saudozo Nino Konis Santa mai konsentra iha Loe-Laco hún hodi forma estrutura no fó tomadadepose ba ema na’in-tolu atu hamoris ahi iha rejiaun IV hodi halo gerilla kontra forsa Indonézia.
Nia hatutan, bainhira governu realiza planu ne’e ba futuru bele atrai vizitór rai-laran no rai-li’ur barak mai vizita atu buka hatene istória luta ne’ebé gerileiru-sira halo.
“Ita haree ba tempu naruk, vizitante aban-bainrua sei mai hodi hatama osan ba ita-nia nasaun, ita haree iha fatin seluk-seluk ne’e iha, maibé ita parte fronteira ne’e sei mínimu liu,” nia katak.
Prezidente Autoridade Munisípiu Bobonaro, Alexandrino Pires, sei hatutan ba Governu Sentrál atu kontinua tau prioridade hodi kontinua planu ne’e.
“Agora ita foku lai ho estrada, ha’u mós senti hela katak, se ita la hahú ita laiha istória, liuliu parte rejiaun IV, entaun fatin ne’e bainhira ita realiza, ita lori hatuur ona istória rejiaun IV ninian, tanba tomadadepose iha fatin ne’e duni,” nia katak.
Objetivu prinsipál atu estabelese jardín rezisténsia ne’e atu asegura no halo prezervasaun espasu istóriku hosi Saudozu Nini Konis Santana inklui istória rejiaun IV nian no sei sai mos hanesan sitíu turizmu istóriku.
Notísia relevante: AMRT – Autoridade Bobonaro diskute atu dezeña futuru jardín Nino Konis Santana
Jornalista: Sérgio da Cruz
Editór: Evaristo Soares Martins
