DILI, 09 agostu 2024 (TATOLI)— Asosiasaun Defisiente Timor-Leste (ADTL), organiza eventu Espozisaun karreira ba foinsa’e defisiénsia ho tema “Haree hau-nia abilidade la’ós ha’u-nia defisiénsia” iha Jardim 5 de maio, Colmera, Dili, ohin.
Diretór Ezekutivu ADTL, Cesário da Silva, hateten, objetivu husi eventu prinsipál hamutuk ho defisiénsia foinsa’e lori sentru formasaun sira-ne’ebé eziste iha TL, hodi hatudu área treinamentu sira ba portadór defisiente sira.
“Intensaun hosi ne’e atu sensibiliza sira-nia área formasaun saida de’it mak sira iha. Nune’e hamosu espozisaun ida-ne’e tanba durante ne’e númeru ema ho defisiénsia menus partisipa iha sentru formasaun sira iha TL,” Cesário dehan hafoin partisipa espozisaun ne’e.
Tema ne’e refere ba entidade públiku no sentru formasaun sira ne’e hodi haree ema nia abilidade.
“Área ne’ebé ita konvida mai iha ne’e kuaze sanolu, mak otélaria, Barista, aleinde ne’e kafetária, iha mós kanalizasaun no soldadura, administrasaun – finansa, komputadór, kostura, formasaun jornalizmu nian mós, iha sentru agrikultura. Ida-ne’e difísil tebes sira atu halo maibé teknolójia tulun sira bele halo, importante mak abilidade nune’e bele jere, halo jestaun mákina no halo produsaun,” líder másimu ADTL ne’e dehan.
Ezekutivu ne’e relata, daudaun iha ne’e sentru formasaun 12, husi Dili, Gleno, Lautém, Baucau, Ahisaun, AHA Education SOLS. Sentru formasaun sira-ne’e sufisiente maibé iha sentru ida rua mak presiza halo melloria ba sira-nia kondisaun.
“Tanba ne’e ita servisu hamutuk nune’e bele haree, sa ita presiza mellora. Problema mak asesibilidade fíziku hanesan kadeira roda. Agora kona-ba asesu informasaun, kolega defisiénsia tilun presiza saida. Entaun, ami ko’alia hela atu iha mós tradutór lian, ba matan ita mós ko’alia ho sentru formasaun atu instala software balun nune’e bele fasilita,” nia informa.
Atividade ida-ne’e hetan apoiu másimu husi Governu Austrália liuhusi Austrália Pacific Training Coalition (APTC), no osan ba espozisaun loron ohin hamutuk rihun $15. Ida-ne’e sei iha kontinuasaun no APTC apoiu ADTL nia projetu ne’e kuaze rihun $67. Orsamentu sira-ne’e mós ba programa empodera ema ho defisiénsia hodi integra sentru formasaun sira inklui mós fasilita sentru formasaun husi munisípiu mai.
Iha biban ne’e, Reprezentante Embaxadór Austrália, Deputy Embaixadór Ed Wilkinson, rekoñese katak eventu ida-ne’e inisiativa di’ak tebes husi ADTL hodi fó tulun no asegura katak asesu ba servisu no treinamentu tanba asuntu ne’ebé relasiona ho defisiénsia no difikuldade atu hetan asesu ba edukasaun, iha oportunidade no prioridade ba Governu Austrália.
Programa Governu Austrália nian ne’e atu oferese oportunidade hanesan. Tanba ne’e, treinamentu ohin ne’e importante tebes ba empreendedorizmu, no mós benefísia ekonomia Timor-Leste nian.
“Ohin marka atinjemente ba ita hotu no ohin mós sai momentu importante, inkluzividade, efetividade ba nasaun ne’e nian. Nune’e iha espozisaun, ha’u enkoraja hodi aproveita oportunidade no louva ita-boot sira-nia (defisiente) ambisaun ba futuru ne’ebé refleta ba partisipasaun loron ohin,” nia enkoraja.
Ho susesu husi espozisaun karreira defisiénsia dahuluk, APTC kontinua fó apoiu ba Expozisaun daruak ne’ebé ADTL hala’o hodi asegura kompromísiu kontinua atu hadi’a formasaun no rezultadu empregu ba ema ho defisiénsia sira. Kolaborasaun no kompromísiu kontinua husi parte interresada hotu-hotu ne’e esensiál tebes atu sustenta no haluan esforsu hirak-ne’e
Entretantu, Sensu populasaun no uma-kain 2022 rejista ema ho defisiénsia hamutuk 93,000.
Jornalista: Osória Marques
Editór: Rafael Ximenes de A. Belo
