BOBONARO, 12 agostu 2024 (TATOLI)-Projetu Programa Nasionál Dezenvlvimentu Suku (PNDS) siklu neen konstrusaun ponte iha suku Genulai, postu administrativu Cailaco, munisípiu Bobonaro to’o agora seidauk implementa serbisu fíziku.
Xefe suku Genulai, Alexandre Afonso, aprezenta kestaun ne’e durante halo diálogu ho Prezidente Autoridade Munisipál Bobonaro, Alexandrino Pires,vho komitiva, kinta ne’e.
Notísia relevante: PNDS Bobonaro menus rekursu umanu kontrola projetu
“Siklu neen iha postu Cailaco, seidauk implementa so suku Genulai, tanba probelma oituan, momentu loke kuotasaun kompañia fornesedór loos hotu ona no kompañia lokál mós ha’u aprova tiha ona, maibé problema ho badaen, durante ne’e ha’u ko’alia ho sira, maibé sira la simu nafatin,” nia hateten iha sede suku Genulai.
Diretór PNDS Munisípiu Bobonaro, Rosário Mali, husu ba komunidade sira atu koordena ho líder komunitária hodi implementa projetu ne’e molok udan monu-rai.
“Ha’u hanoin ida-ne’e problema, agora daudaun ita hela de’it fulan-haat to’o agora seidauk implementa, tanba outubru mak ne’e udan ona, entaun atu mobiliza materiál ne’e susar la halimar, sé ita trava beibeik ita-nia ponte la halo, tanba tuir despaisu ne’ebé Ministru fó mai katak orsamentu hotu-hotu tenke fila molok 31 dezembru, entaun ita tenke servisu tanba salva tih orsamentu rihun $39, se la ita lakon, tanba ne’e osan bo’ot,” nia katak.
Nia rekoñese traballadór barak lakohi halo serbisu, tanba insentivu ne’ebé prevee iha Bill Off Quantitity (BOQ) husi projetu PNDS ne’e ki’ik liu kompara ho grande projetu.
“Ita-nia traballadór-sira husu aas liu ida ne’e, maibé ha’u husu ba inan-aman sira ita labele hare liu ba osan ne’e, tanba prioridade ne’e ita-boot sira mak deside rasik, imi mak hakarak tau ponte, tanba ne’e mak governu liuhosi programa PNDS aloka orsamentu mai ita-boot sira,” nia esplika.
Prezidente Autoridade Munisípiu Bobonaro, Alexandrini Pires, rekomenda ba komunidade no líder komunitária tuur hamutuk atu buka solusaun hodi implementa obra ne’e.
Tuir nia, bainhira orsamentu ne’e la ezekuta tinan ne’e, iha tinan oin mai governu sei la fó tan orsamentu atu halo dezembolvimentu ba suku Genulai.
Nia dehan, insentivu ba badaen labele aumenta, tanba orsamentu ne’ebé prevee iha BOQ mak nune’e.
“Ha’u hanoin osan $7000 ne’e ba badaen sira sufisiente, tanba imi la presiza ba hela kos, aluga karreta, imi tetu halo didi’ak ba,” nia fó hanoin.
Enkuantu projetu ne’ebé implementa iha suku Genulai hamutuk tolu, kompostu husi RKRE konstrusaun moru haleu sede suku ho totál orsamentu rihun $24-resin ne’ebé dadaun ne’e la’o hela.
Alende ne’e projetu siklu lima mai husi orsamentu 2023 ho kustu rihun $37 hodi loke estrada husi Genulai ba Poerema no siklu neen projetu konstrusaun ponte distánsia metru haat ho kustu rihun $39.
Notísia relevante: Governu sensibiliza matadalan implementasaun projetu PNDS iha Bobonaro
Jornalista: Sérgio da Cruz
Editór: Evaristo Soares Martins
