BOBONARO, 13 agostu 2024 (TATOLI)-Negosiante sira husu ministériu kompetente tau-matan rezolve kondisaun merkadu postu administrativu Bobonaro, munisípiu Bobonaro tanba infraestrura fíziku atuál kuaze aat no la seguru ona atu halo atividade negósiu.
Negosiante Domingos Cristovão Tevez, argumenta bainhira governu iha planu atu halo konstrusaun foun, di’akliu muda ba fatin seluk, tanba estrutura rai iha merkadu atuál la metin.
Notísia relevante: Autoridade Bobonaro prepara planu asaun anuál 2025
“Se bele karik buka alternativu seluk, atu bele halo fali konstrusaun foun ba merkadu ida-ne’e, tanba iha-ne’e ami-nia vida ameasadu, rai ne’e iha haree iha laran la metin, ita fa’an sasán iha laran sente la seguru ona tanba rai halai,” nia informa ba TATOLI, tersa ne’e.
Xefe suku Bobonaro Vila, Jacinto Godinho Perreira, hateten Governu presiza konsidera problema ne’e iha planu orsamentu tinan fiskál 2025.
Líder komunitária ne’e mós prefere muda merkadu ba fatin seluk tanba merkadu atuál kloot ka laiha espasu ba negosiante sira atu halo atividade negósiu.
Nia dehan, bainhira Governu iha ona planu, entaun líder komunitária iha postu administrativu Bobonaro sei tuur hamutuk ho lia-na’in no komunidade sira atu identifika rai prioridade hodi harii merkadu foun.
“Ha’u hanoin ida-ne’e laiha problema, tanba ami suku viziñu depois ami hatene ami-nia lala’ok kultura, ida-ne’e ita halo di’ak ba komunidade iha postu Bobonaro atu halo negósiu ho di’ak,” nia konklui.
Enkuantu merkadu referida iha loron bazar kada sábadu akumula negosiante sira husi suku 18 ne’ebé pertense ba postu administrativu Bobonaro.
Notísia relevante: Autoridade Bobonaro propoin millaun $7-resin ba OJE 2025
Jornalista: Sérgio da Cruz
Editór: Evaristo Soares Martins
