PR Horta apresia atleta taekwondo ne’ebé konsege rekolla medalla 30 iha Kupang
DILI, 27 agostu 2024 (TATOLI) – Prezidente Repúblika, José Ramos Horta, tersa ne’e, hasoru malu ho Atleta timoroan husi modalidade taekwondo, hodi hato’o apresiasaun tanba konsege rekolla medalla hamutuk 30 iha torneiu ne’ebé realiza iha provínsia Kupang-Indonézia, iha fulan-Jullu.
Medalla 30 ne’e kompostu husi medalla osan mean hamutuk 16, osan mutin hitu (7) no osan metan hitu (7).
“Ita nia atleta besik 100 no ba partisipa iha eventu ne’e no hetan mós tulun husi Prezidensia Repúblika.Ha’u rona hotu-hotu hatudu komportamentu di’ak, no simu prémiu lubuk oi-oin. Maibé ha’u hatete manán ka lakon ne’e di’ak atu ita ida-idak kontente.Tanba primeiru sira ba pasiár to’o Kupang, segundu fó hanesan kbiit inspirasaun ba sira, kontente bainhira sira hotu-hotu komportamentu di’ak ne’e mós hamorin Timor nia naran mós iha mundu,” dehan Xefe Estadu.
Horta dehan tan, “Ba ha’u esforsu atu manán maibé manan ka lakon la’ós importante, importante liu partisipa ho disiplina.”
Iha fatin hanesan, Responsavel Taekwondo Koni Timor-Leste, Oscar Lucio, hateten iha fulan Jullu, atleta taekwondo ba partisipa kampionatu internasionál 2024 iha Kupang konsege rekolla medalla 30, kompostu medalla osan mean 16, osan mutin hitu, no osan metan hitu.
“Ba oin ha’u sente kampionatu ida ne’e sei hala’o tinan-tinan sira sei kontinua, ne’ebé primeiravez halo taekwondo Koni Timor -Leste sai hanesan mellora ekipa iha 2022, 2024 tun uitoan sai tiha segundu mellor ekipa, tinan hira fali mai ha’u sente sei kontinuasaun treinu alkansa tan mehi atu bele hadau fila-fali mellor ekipa iha datoluk nian,” nia kompromete.
Jornalista: Hortencio Sanchez
Editor: Florencio Miranda Ximenes
