Timor Leste-Malázia asina akordu importante tolu iha área edukasaun
LIQUIÇA, 29 agostu 2024 (TATOLI) – Governu Timor-Leste liuhusi Vise-Primeiru-Ministru, Ministru Koordenadór Asuntu Sosiál no Ministru Dezenvolvimentu Rurál Abitasaun Komunitariu, Mariano Assanami Sabino ho Vise-Primeiru-Ministru Malázia Dato Seri Ahmad Zahid Hamidi asina akordu importante tolu iha área edukasaun.
“Ita mós asina akordu hamutuk tolu iha área edukasaun nian atu haruka ita nia estudante husi Timor-Leste ba eskola iha Malázia iha mastradu no doutoramentu, akordu ita asina ona no ba oin haka’at ona ba implementasaun,” Assanami hateten ba jornalista sira iha Lauhata, kinta ne’e.
Nia esplika akordu tolu ne’e ida asina ho Fundu Dezenvolvimentu Kapitál Umanu (FDCH-sigla portugés) ne’ebé presiza atu servisu hamutuk atu fó formasaun ba joven sira iha área oioin.
Akordu segundu asina entre Universidade Nasionál Timor-Lorosa’e (UNTL) ho Universidade Sabaah Malázia (USM) no akordu terseiru asina entre Institute off Busines (IOB) ho Universidade Kuala-Lumpur hodi ba futuru atu servisu hamutuk no haruka estudante timoroan atu ba eskola iha Malázia.
Assanami dehan, daudaun ne’e Malázia ho inisiativa hakarak ofrese bolsa estudu ba timoroan hamutuk 50 atu ba eskola iha Malázia.
“Malázia dadaun ne’e ofrese hela bolsa estudu ba timoroan hamutuk na’in-50 ne’ebé atu foti kona-ba mastradu no PsD,” nia hakotu.
Jornalista: Hortencio Sanchez
Editór: Florencio Miranda Ximenes
