DILI, 06 setembru 2024 (TATOLI)—Ministériu Edukasaun (ME) apela ba estudante sira atu kumpre oras tama aula eskola ka hatoman-an bá eskola sedu, tanba dirijente eskola sira preokupa kona-ba kestaun pontualidade.
“Ita dehan foin-sa’e mak futuru nasaun, nune’e oinsá mak foin-sa’e sira atu halo dezenvolvimentu se kuandu bá eskola de’it mós tarde,” Sekretáriu Estadu Ensinu Sekundária Jerál no Tékniku Vokasionál, Domingos Lopes Lemos, hateten, iha ninia knaar fatin, Vila-Verde, sesta ne’e.
Governante ne’e dehan, estudante sira presiza prepara-an sedu bainhira lakohi tarde bá eskola.
“Se ko’alia kona-ba prepara transporte mini bus ruma ba estudante ne’e, ha’u hanoin ita prepara rihun ba leten tanba estudante sira barak. Entaun, konsiénsia estudante sira-nia mak meiu saida mak sira bele iha atu bá to’o iha eskola sedu ne’e mak isin moris hadeer sedu, tanba dadeer tuku 08:00 ne’e ema barak bá serbisu, entaun ema hadau malu bemo, entaun kuandu bemo nakonu labele tula tan estudante sira. Tanba ne’e, estudante sira mak tenke hadeer sedu nune’e tuku 7 sira-ne’e sai ona husi uma ba eskola,” nia akresenta.
Notísia relevante : ME hahú halo imprensaun ba pontu ezame nasionál
Iha sorin seluk, Diretór Eskola Ensinu Sekundáriu Jerál 12 Novembru, Marcelino Menezes Babo, preokupa ho estudante sira ne’ebé tama aula tarde tanba transporte públiku ne’ebé tula estudante ne’e mínimu tebes.
“Ita presiza ona iha hanoin ne’ebé di’ak relasaun ho estudante sira ne’ebé mak bá eskola tarde, eskola loloos tama tuku 08:00 maibé estudante sira iha tuku 08:00 sei hamriik iha estrada hein transporte, entaun tuir loloos ita tenke haree ona atu nune’e buat ne’e labele akontese beibeik, pelumenus aranja took transporte espesiál ba estudante sira, maski selu ba mós pelumenus estudante sira bá eskola sedu,” nia tenik.
Tanba ne’e, Diretór eskola husu ba IX Governu Konstitusionál atu fasilita karreta ruma ba estudante sira atubele kobre husi terminál Becora to’o Tasi-tolu, nune’e estudante sira labele tama tarde eskola. Dalaruma estudante sira hadau malu ho mikrolet maibé kondutór sira labele tula estudante sira tanba montante selu transporte la hanesan.
“Objetivu Governu atu arranja transporte ne’e para tuku 08:00 ne’e sira hotu iha ona eskola no prosesu ensinu aprendizajen mós la’o normál ona. Ita halo hanesan ne’e atu prepara jerasaun foun sira atu halo dezenvolvimentu ba ita-nia rai ida-ne’e liuhusi matenek ne’ebé sira iha,” Diretór katak.
Nune’e mós, Estudante Marilia Ximenes, sente triste tanba tuir ensinu aprendizajen tarde beibeik tanba kestaun transporte.
“Nu’udar estudante ha’u sente triste tanba ita hela dook husi eskola, entaun dadeer ami mai eskola ne’e tarde beibeik, ami mak atu hadeer sedu mós dalaruma kondutór sira la tula ami tanba dehan ami selu sentavu 0,15 no dalaruma mós bemo mai nakonu hela de’it, entaun ida-ne’e sai difikuldade ba ami,” nia salienta.
Estudante haktuir, dalaruma to’o tama eskola atu partisipa ezame tarde, nune’e estudante sira tenke tuir ezame tuir mai tanba transporte dadeer nian laiha.
“Tanba ne’e, husu ba Governu atu buka meiu oinsá para ba oin ne’e bele iha planu adekuadu hodi fasilita ami ho transporte espesiál ba estudante de’it, maski ami selu mós la buat ida, importante ami labele hadau malu ho funsionáriu sira,” nia sujere.
Jornalista : Osória Marques
Editora : Julia Chatarina
