Amu Papa klarifika ninia intensaun kona-ba ‘Lafaek Rai-Li’ur’
ROMA, 13 setembru 2024 (TATOLI) – Papa Francisco fó klarifikasaun kona-ba ‘Lafaek Rai-Li’ur’ ne’ebé nia temi iha ninia mensajen ikus durante selebrasaun Misa Solene iha Tasi-Tolu, tersa foin lalais ne’e.
Klarifikasaun ne’e Papa fó durante viajen husi Singapura bá Roma, hodi responde ba interpretasaun oioin kona-ba ‘Lafaek Rai-Li’ur’ ne’ebé espalla iha media sosiál.
Bainhira jornalista Timoroan husu Papa ninia esplikasaun kona-ba ‘Lafaek Rai-Li’ur’, Papa hatan ho hamnasa dehan imajinasaun ne’e nia refere ba ideia husi rai-li’ur ne’ebé tama daudaun ona Timor-Leste.
“Bainhira ha’u ko’alia kona-ba ‘Lafaek Rai-Liur’, ha’u refere ba ideia husi rai li’ur ne’ebé mak tama ona Timor-Leste hodi estraga armónia ne’ebé imi iha,” Papa hatan ba jornalista Timoroan nia pergunta durante konferénsia imprensa iha Aviaun Singapore Airways laran bá Roma, sesta ne’e.
Iha Konferénsia ne’e, Santu Padre mós espresa ninia sentimentu kontente bainhira nia ko’alia kona-ba ninia vizita mai Timor-Leste.
Husi vizita loron tolu iha Timor-Leste, Papa hateten nia hadomi tebes Timor-Leste, tanba povu idake simples no haraik aan.
Tuir observasaun Jornalista TATOLI, I.P, reasaun alegria Povu Timor-Leste ba Santu Papa nia vizita boot tebes kompara ho nasaun seluk ne’ebé mak Santu Padre vizita iha ninia jornada ba ASEAN no Oseania.
“Timor-Leste nasaun idake simples tebes, moris iha família idake metin,” Papa Francisco deskreve.
Santu Padre dehan kultura Timor-Leste mak kultura ida-ne’ebé moris tanba ho labarik nia hamnasa.
Hanoin hikas katak, Amu Papa nia liafuan ikus iha Misa Solene Tasi-tolu katak nia sei lahaluha hamanasa furak nia simu husi labarik Timor-Leste.
Papa Francisco hakotu ninia resposta ba Jornalista Timor-Leste iha konférensia ne’e dehan, “Hau hakarak hatete buat ida ba imi, Ha’u Apaixonadu ho Timor-Leste (I fell in love with Timor-Leste).
Mensajen ikus Santu Padre nian iha Misa Solene Tasi Tolu: “Kuidadu ho Lafaek Rai-Li’ur.”
Hau hanoin barak loos kona-ba saida mak diak liu iha Timor-Leste, Ai-Kameli, Ai-Teka, lae ne’e la’ós buat diak liu iha ne’e. Buat di’ak liu mak Timor-Leste nia povu.
Ha’u sei lahaluha suku ida iha Estrada sorin ho labarik sira. Labarik na’in hira mak iha suku ne’e. Buat ne’ebé di’ak liu husi suku ne’e mak labarik sira-nia hamnasa.
Sidade ne’ebé hanorin nia oan sira hamnasa mak sidade ne’ebé iha futuru.
Maibé kuidadu, tanba ha’u rona dehan lafaek sira mai daudaun ona tasi-ibun. Lafaek sira ne’e nani mai ona no lafaek ne’e kuandu tata, ita la aguenta (latahan).
Tenke kuidadu, tenke kuidadu ho lafaek sira ne’e tanba sira hakarak muda imi-nia kultura, no imi-nia istória. Imi tenke hadook an husi lafaek sira ne’e tanba nia kuandu tata ona, nia tata maka’as.
Ha’u-nia dezeju dame ba imi hotu. Ha’u hakarak imi tenke kontinua iha labarik barak, atu nune’e hamnasa sidade nian sei nafatin hatutan ba labarik sira.
Kuidadu imi-nia oan sira, maibé kuidadu mós imi-nia avó sira. Sira memória nasaun nian.
Obrigadu barak ba imi-nia karidade, ba imi-nia fiar no ba imi-nia esperansa.
Agora, mai ita husu Nai Maromak Nia Bensaun. Depois, ita sei kanta hamutuk knananuk Virjen Maria.
Jornalista: Filomeno Martins
Editór: Rafy Ximenes de A. Belo.
