OÉ-CUSSE, 19 Setembru 2024 (TATOLI) – Programa Nasionál ba Dezenvolvimentu Suku (PNDS) Rejiaun Administrativa Espesiál Oé-Cusse Ambeno (RAEOA) hatuur fatuk dahuluk ba projetu reabilitasaun estrada rurál metru 650 iha bairru Kuankiub liga bá bairru Lil-As, aldeia Pune, suku Usitasa’e, sub-rejiaun Oésilo.
Diretór PNDS Oé-Cusse, João Bobo, informa katak projetu estrada ne’e kontinuasaun husi siklu dalimak nian, ne’ebé antes ne’e reabilita ona husi igreja Oélmambai bá to’o de’it bairru Kuankiub. Nune’e iha siklu daneen, tinan ne’e, kontinua husi Kuankiub liga bá bairru Lil-As ho distánsia metru 650.
“Tipu estrada ne’e uza rabat-betong, maibé ita identifika fatin ne’ebé risku persiza atu halo. Entaun, ita halo no fatin ne’ebé iha tempu udan laiha taho, ita sei la reabilita maibé tau de’it drainajen no halo bee-dalan”, João Bobo hateten ba Tatoli.
Notísia relevante: Autoridade lokál preokupa reabilitasaun estrada rurál iha Usitasa’e laiha ponte
Iha lansamentu fatuk dahuluk ne’e, diretór PNDS ne’e fó hanoin ba empreza atu aselera projetu estrada referidu molok udan monu rai iha dezembru, nune’e komunidade no transporte sira bele utiliza.
“Fornesimentu materiál ida-ne’e serbisu kompañia nian. Materiál labele falta, liuliu rai-henek, simentu no besi betong karik iha ponte ruma persiza tau, tanba liga ba halo estrada entaun materiál sira-ne’e mak persiza, tanba to’o dezembru udan ona. Ne’ebé, kompañia persiza lalais, servisu bele to’o fin do ano, komunidade no transporte bele asesu ona”, nia espera.
Xefe suku Usitasa’e, Tomas Ulan Colo, dehan projetu reabilitasaun estrada rurál ne’e prioridade ba suku Usitasa’e iha siklu daneen atu fasilita komunidade husi bairru Kuankiub, Lil-As no Nakome bele asesu bá merkadu ho di’ak iha tempu udan.
“Tanba komunidade barak mak hela iha Nakome, Lil-As. Iha tempu udan mota tuun estrada nakonu ho tahu, entaun ita prioriza ba siklu daneen iha suku Uistasa’e atu hadi’a estrada ne’e hodi liga komunidade sira asesu bá merkadu Pune iha tempu udan, tanba projetu fulan tolu de’it, ne’ebé to’o Dezembru tempu udan ita-bele uza ona”, nia salienta.
Notísia relevante: Reabilitasaun merkadu tradisionál Pune besik remata
Projetu ne’e ezekuta husi empreza Jenijefa Unipesoál Lda. ho valór kontratu hamutuk $48.750 ho durasaun serbisu fulan tolu, hahú iha Setembru no sei remata iha Novembru 2024.
Jornalista: Abílio Elo Nini
Editora: Maria Auxiliadora
