Ekipamentu no infraestrutura iha Jardín Arte no Pintura Palaban balun aat ona

OÉ-CUSSE, 24 Setembru 2024 (TATOLI) – Ekipamentu halimar ba labarik, síntina no lutu ne’ebé konstrui iha Jardín Arte no Pintura iha rotunda Palaban, Suku Costa, sub-rejiaun Pante Makasar, balun  aat ona.

Tanba ne’e, xefe suku Costa, Francisco Colo, rekomenda ba autoridade Rejiaun Administrativa Espesiál Oé-Cusse Ambeno, liuliu parte turizmu atu tau-matan hodi koloka pesoál seguránsa iha fatin ne’e.

“Ne’e ita konsidera fatin turizmu, entaun diresaun ne’ebé responsabiliza presiza hadi’a fali ou destaka pesoál seguransa, tanba ne’e uluk halo ho osan Estadu”, Francisco Colo dehan iha Oé-Cusse, ohin.

Notísia relevante: Kampu Palaban sai fatin ba realizasaun Festivál Kultura Fronteira 2024   

Lidér komunitáriu ne’e hateten fatin ne’e atrai ema, tanba durante ne’e estudante no ema balun bá hasai retratu. “Iha inísiu ita haree moos no furak, maibé ikus-ikus ne’e lutu mós monu hotu, soe fo’er arbiru, hariis-fatin sira mós kuaze la funsiona. Ekipamentu halimar ba labarik mós balun aat ona. Ida-ne’e persiza haree no labele husik de’it hanesan ne’e”, nia sujere.

Nia espera katak bele hadi’a jardín ne’e tanba obra referida konstrui iha mandatu autoridade anteriór no gasta osan Estadu, nune’e persiza atu asegura.

“Ha’u hanesan xefe suku só fó hanoin de’it. Ha’u mós laiha kbiit tanba ita laiha orsamentu kona-ba buat hirak-ne’ebé ligasaun ho área turizmu. Osan iha karik ita bele hadi’a, maibé ida-ne’e autoridade sira mak tenke haree, tanba Governu anteriór halo ona, entaun ita tenke hadi’a fali”, nia realsa.

Notísia relevante: Autoridade aloka rihun $4-resin reabilita fatin turístika haat iha Pante Makasar  

Jornalista Tatoli tenta konfirma asuntu ne’e ho Unidade Turizmu, ne’ebé tutela iha Gabinete Prezidente Autoridade RAEOA, maibé rejeita fó informasaun tanba okupadu ho serbisu seluk.

Rekorde katak, iha janeiru 2023, Autoridade RAEOA aloka orsamentu hamutuk $4.113 ba reabilitasaun fatin turizmu haat ne’ebé lokaliz iha suku Costa sub-rejiaun Pante Makasar.

Fatin sira ne’e mak Jardín Arte Pinta Moru lokaliza iha bairru Palaban, iha aldeia Sanane, Jardín Koreanu lokaliza iha bairru Oébau, iha aldeia Sanane, no fatin turizmu relijiozu rua mak hanesan Fatu-Suba iha bairru Sikluli, aldeia Sanane, no gruta Santo António Polsiba iha bairru Meok-Ana, iha aldeia Oésono. Obra ne’e halo husi empreza lokál Maysalu Unipessoal Lda.

Jornalista: Abílio Elo Nini

Editora: Maria Auxiliadora