Oe-leu oan halibur osan konstrui Kapela
BOBONARO, 28 setembru 2024 (TATOLI)—Pároku Igreja Nossa Senhora Imaculada da Conceição iha postu administrativu Bobonaro, Padre Ernesto Barreto, hamutuk ho Administradór postu administrativu Bobonaro, Tomas Barreto Henriques no lia-na’in sira, sabadu ne’e, hatuur fatuk-inan dahuluk hodi hahú konstrusaun Kapela Santu Padre Fransisco Lemili Oe-leu, ne’ebé lokaliza iha área Muk-Hok, aldeia Oe-leu Taz, suku Oe-leu.
Kapela ne’e harii ho kontribuisaun osan husi komunidade suku Oe-leu rasik no Oe-eleu ona, ne’ebé namkari iha rai-laran no rai-li’ur hanesan Atambua Indonézia, Austrália, Koreia Súl no Inglatera.
Padre Ernesto Barreto, agradese no konsidera inisiativa ne’e hanesan ezemplu di’ak ida husi komunidade, liu-liu joven Oe-leu atu hahú hakbesik-an ba Maromak.
“Uluk ema dehan Oe-leu ne’e nakonu ho kriminozu, naok-ten, maibé derrepente imi buka hanoin ida ho imajen ne’ebé diferente ne’e ba ha’u buat foun ida, ha’u apresia imi tanba imi husik ona toman a’at sira uluk, imi Oe-leu tenke fó ezemplu hodi sai masin no naroman ba mundu,” Padre Ernesto hateten iha sede suku Oe-leu.
Bibi-atan ne’e husu ba Komisaun Organizadora no líder komunitáriu sira atu halo koordenasaun ho Bispu Dioseze Maliana, ne’ebé nu’udar na’in ba Kapela no Igreja sira ne’ebé eziste iha munisípiu Bobonaro.
Notisia Relevante : Estrada iha Oe-leu haterus komunidade viajen Maliana-Bobonaro
Alende ne’e, Padre Ernesto mós enkoraja Oe-leu oan sira hotu atu nafatin hatudu unidade no sólidu nune’e bele iha hanoin ida de’it, katak tinan oin Kapela foun ne’e tenke finaliza ona ninia konstrusaun.
“Ha’u la gosta buat tinan-tinan butuk fatuk tia, depois la halo to’o hotu, ha’u hakarak katak tau ona fatuk tenke remata,” Amu Padre ne’e hameno.
Iha biban hanesan, Administradór postu administrativu Bobonaro, Tomas Barreto Henriques, sente orgulu no apresia ho inisiativa komunidade suku Oe-leu tanba atu harii obra hanesan ne’e la’ós buat ida fásil.
“Iha Oe-leu ita hare joven sira dala-barak ita rona joven sira halo problema bebeik, maibé agora sira muda ona sira-nia hanoin no karakter ba buat di’ak. ida-ne’e ha’u agradese tanba obra sira hanesan ninia prosesu la fasil, ha’u fiar Oe-leu mós bele, labele hanesan iha fatin balun ne’ebé halo tia kepela to’o ikus la hotu husik hela,” Autoridade postu fó hanoin.
Notisia Relevante : Progresu reablitasaun sede suku Oe-leu atinje 45%
Xefe suku Oe-leu, Januário Meta-Tae Bragança, hateten, komunidade deside harii Kapela ne’e tanba durante ne’e bainhira atu ba misa tenke la’o ho distánsia ne’ebé dook.
“Ami planu ne’e iha tinan hirak liubá, tempu naruk ona, maibé nia prosesu kleur, ohin mak foin hahú. Inisiativa harii Kapela tanba Oe-leu ne’e nu’udár sentru ida atu nune’e sarani sira atu ba misa labele ba fatin dook, ami haree Kapela ida-ne’e la’ós de’it ba suku Oe-leu maibé ba mós suku viziñu sira hanesan Ai-Asa, Raifun, Uat-Ritabou no Odomau”Januario konklui
Infraestrutura ne’e ho medida metru 8×16, inklui toilet no haris-fatin.
Jornalista : Sérgio da Cruz
Editora : Julia Chatarina
