Komunidade husu IGEADI aterru rai-henek iha estrada Utedai-Halekou
BOBONARO, 30 setembru 2024 (TATOLI)-Komunidade sira husu ba Autoridade Munisípiu Bobonaro no Institutu Jestaun Ekipamentu Apoia Dezenvolvimentu Infrastrutura, Intitutu Públiku (IGEADI, IP) atu aterru rai-henek no fatuk iha estrada husi diresaun Utedai ba áldeia Halekou, suku Ritabou, postu administrativu Maliana hodi fasilita movimentasaun públiku.
Estrada antigu ne’e rasik daudaun ne’e ekipa IGEADI, IP halo hela normalizasaun bazeia ba pedidu husi Autoridade Munisipál Bobonaro lideradu Alexandre Pires.
Komunidade, Faustina da Silva Maia, sente kontenti no agradese ba governu lokál no IGEADI, IP ne’ebé konsege halo ona normalizasaun ba estrada ne’e, maibé tuir nia iha tempu udan bele fó impaktu movimentasaun tranporte, tanba tahu sei nakonu iha estrada laran.
Notísia relevante:IX Governu presiza konsidera estrada Bobonaro-Lolotoe iha OJE 2024
“Ita hare ba iha tempu bai-loro estrada ne’e di’ak, maibé tempu udan arraska uitoan komunidade atu asesu ba iha estrada ne’e, tanba ita hare sira dudu sai de’it rai maibé la tau-netik rai-henek ka buat ruma iha estrada ne’e, kuandu udan mai tahu maka’as fali, uainhira emerjénsía ruma inan Isin-rua atu partus lori ba ospitál arraska oituan,” nia informa ba jornalista sira, iha Halekou, segunda ne’e
Xefe Aldeia Halekou, Domingos Mau-Lelo, reforsa, bainhira IGEADI, IP la ateru rai-henek tempu-udan estrada ne’e sei grave liután
“Ha’u-nia komunidade sira atu lori produtu lokál ba fa’an iha merkadu mós arraska ona, ne’e mak ha’u reprezenta komunidade hato’o ba nai-ulun sira, se bele karik halo Pengerasan ou ateru netik rai-henek ruma para iha tempu udan sira bele asesu ba mai” autoridade lokál ne’e katak.
Ba kestaun ne’e Jornalista TATOLI komfirma ho pesoál ekipa IGEADI, IP ne’ebé halo normalizasaun estrada ne’e informa katak iha tempu-badak sei halo enduresimentu (Pengerasan), enkuantu estrada ne’e liga mós ba postu administrativu Balibo no Atabae.
Aldeia Halekou iha populasaun pur-volta 500-resin xefe fámilia 172 ne’ebé fahe ba bairru rua hanesan Halekou Lama no Halekou Baru.
Notísia relevante: Deputada CNRT husu MOP hadi’a estrada ba fatin turizmu Soelesu-Bobonaro
Jornalista: Sergio da Cruz
Editór : Rafael Ximenes de A. Belo
