DILI, 11 outubru 2024 (TATOLI) – Governu Timor-Leste liuhusi Ministru Planeamentu Investimentu Estratéjiku (MPIE), Gastão Sousa kontinua hametin kooperasaun ho Governu Indonézia, liuhusi asina Memorandu Entendimentu (MoU) ida ho Ministru Planeamentu Dezenvolvimentu Nasionál ou Ajénsia Planeamentu Dezenvolvimentu Nasionál (Bappenas) Repúblika Indonézia nian, Suharso Monoarfa kona-ba kooperasaun dezenvolvimentu.
Nota ne’ebé asina estabelese enkuadramentu ida ba kolaborasaun kona-bá aspetu oioin iha dezenvolvimentu nian hodi alkansa prioridade dezenvolvimentu nasionál nasaun rua nian no meta global sira ho objetivu dezenvolvimentu sustentável sira hanesan infraestrutura, kapitál umanu, ekonomia no dezenvolvimentu sustentável.
Ámbitu kooperasaun nian kobre transporte, enérjia, edukasaun no formasaun profisionál, komérsiu no investimentu, mitigasaun ba mudansa klimátika, no transformasaun dijitál.
“Indonézia ho Timor-Leste iha relasaun besik tebes iha aspetu oioin, tantu iha istória, ekonomia no kultura, ne’ebé hametin relasaun entre nasaun rua ne’e espesial tebes,” Ministru Gastão tenik liuhosi nota ne’ebé Agência TATOLI asesu, ohin.
Ministru Gastão salienta, Kooperasaun ne’e bazeia ba prinsipiu igualdade, respeitu malu no benefísiu mútua.
“Ami fiar katak ho servisu hamutuk, ita bele atinji ita ida-idak ninia prioridade dezenvolvimentu ho efetivu no inkluzivu. Ami hein katakliu husi kooperasaun ne’e, enérjia mós, dezenvolvimentu sustentável, no setór sira seluk, ita bele kria impaktu ida ne’ebé loos no sei sente husi povu nasaun rua nian. Hein katak kolaborasaun ne’e sei buras nafatin no fó benefísiu ne’ebé boot liu ba progresu ita-nia nasaun nian” Gastão afirma.
Iha okaziaun ne’e, Ministru Suharso Monoarfa hateten, importánsia husi kooperasaun ba dezenvolvimentu sustentável bazeia ba prinsipiu respeitu mútua no benefísiu sira ne’ebé fahe, no loke oportunidade sira ba kolaborasaun kona-bá troka informasaun, koñesimentu espesializadu no fahe prátika di’ak sira.
“MoU ne’e sei sai enkuadramentu ida ba kooperasaun estratéjiku dezenvolvimentu nian ba nasaun rua ne’e hodi fó apoiu ba atinjimentu ba prioridade no alvu dezenvolvimentu nian tuir prioridade dezenvolvimentu iha nasaun rua ne’e, liu-liu iha alkansa objetivu Dezenvolvimentu Sustentável (ODS),” Suharso Monoarfa tenik.
Tuir MoU ne’ebé iha, nasaun rua ne’e loke espasu ba kolaborasaun no kooperasaun dezenvolvimentu iha setór oioin, iha forma oioin hanesan, troka informasaun no fahe esperiénsia kona-bá mellor prátika, kapasitasaun, kooperasaun téknika, no kooperasaun peskiza nian.
Notisia relevante:KM fó podér ba MPIE asina akordu kooperasaun dezenvolvimentu infraestrutura ho Indonézia
Jornalista: Hortencio Sanchez
Editor: Florencio Miranda Ximenes
