EDTL esforsu Instala enerjia elétrika ba Raifun Foho molok 2025
BOBONARO,14 outubru 2024 (TATOLI) — Eletrisidade Timor-Leste, Empreza Públika halo hela esforsu oioin atu Instala enerjia elétrika ba komunidade aldeia Raifun Foho, suku Raifun, postu Administrativu Maliana, munisípiu Bobonaro molok tama tinan foun 2025.
Koordenadór EDTL,EP Munisípiu Bobonaro, Mário de Jesus, esplika, iha fulan hirak liubá nia parte ho ekipa tékniku halo ona levantamentu dadus iha aldeia Raifun foho no daudaun ne’e submete ona dazeñu ba EDTL,EP nasionál.
Nia fundamenta, bazea ba dezeñu ne’e EDTL,EP nasionál mós tun direita ona ba terrenu halo site visited no ninia prosesu hotu daudaun ne’e hatama ona baze de dadus signifika katak iha ona planu atu implementa obra referida.
Notísia relevante: Abitante aldeia Raifun foho sei toba iha nakukun
“Ita hein de’it ona, ha’u hakarak fó ba komunidade liuliu ha’u-nia inan-aman sira, EDTL la’ós sei kotuk ba ita-boot sira, maibé EDTL mós sei esforsu hela, oinsá mak ita-boot sira hetan ahi ho di’ak, loos duni ita-boot sira sente triste, tanba haree ba kotuk, haree ba leten ahi nabilan, maibé fatin oan ne’e ahi la nabilan, maibé EDTL sei esforsu nafatin, bainhira tinan ida ne’e atu remata mós EDTL esforsu ita-boot sira mós sei hetan ahi hanesan mós maluk sira seluk,” Mário informa ba jornalista sira iha Bobonaro, segunda ne’e.
Mário de Jesus fundamenta, instalasaun ne’e liuhusi Projetu Eletrifikasaun Nasionál (PEN) tanba Raifun Foho dook husi liña distribuisaun jerál. Enkuantu aldeia Raifun foho ho nia totál populasaun na’in 200-resin no uma-kain 64-resin.
Tuir dadus, EDTL,EP konsege instala ona enerjia elétrika ba suku 50 no postu administrativu neen iha Munisípiu Bobonaro, falta de’it aldeia 16, maibé daudaun ne’e iha prosesu ka planu atu implementa obra liuhusi Projetu Eletrifikasaun Komunitária (PEK) no (PEN).
Notísia relevante: EDTL fornese ona enerjia elétrika ba uma-kain 1,676 iha Bobonaro
Jornalista: Sérgio da Cruz
Editór: Evaristo Soares Martins
