MAKLN-MPRM asina memorandu ba futuru kooperasaun iha área rekursu naturál

DILI, 22 outubru 2024 (TATOLI)– Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru” ho Ministru Petroleo no Rekursu Minerais (MPRM) Francisco da Costa Monteiro, tersa ne’e, asina ona memorandu ba futuru kooperasaun iha área rekursu naturál, iha  salaun 3 de Março Maubai.

Ministru Asuntu Kombatente Libertasaun Nasionál, Gil da Costa Monteiro “Oan Soru”, hatete, objetivu hosi asina memorandu ne’e hodi defende riku-soin Timor-Leste nian.

“Ko’alia kona-ba rekursu Minerais ne’e interresante ita tenke halo asina memorandu ho Ministériu Petroleo no Rekursu Minerais tanba ita defende riku-soin, entaun iha área sira hanesan ne’e merese duni Ministériu rua halo akordu nune’e ba futuru teknikamente no polítiku iha ona dalan kompartilla ba-malu iha momentu ne’ebé no bainhira de’it,” Ministru Oan Soru dehan ba jornalista sira, hafoin asina memorandu.

Liuhusi asina memorandu ne’e MAKLN iha esperansa boot hodi lori dezenvolvimentu ne’ebé iha sustentanbilidade ba rai ida-ne’e.

“Ita iha esperansa katak memorandu ida-ne’e bele lori ambiente foun tanba mudansa iha nível empregu no sustentanbilidade ne’ebé reflete ba luta eroi sira-nia hodi lori nasaun ne’e ba dezenvolvimentu,” nia tenik.

MPRM, Francisco da Costa Monteiro iha esperansa katak implementasaun la’o ho di’ak no susesu.

“Ohin ne’e serimónia simples ida maibé ba ha’u bele dehan repzenta esperansa ida, no reprezenta futuru ida, ha’u espera katak depois implementasaun aban bainrua bele to’o no merese duni to’o tuir ita-nia objetivu. Tanba rekursu Minerais ne’e importante la halimar iha ita-nia nasaun. Halo ita-nia pasu ho di’ak, kuidadu esplora mineiru ne’e di’ak nune’e faan no prosesa iha ita-nia rain ida-ne’e,” nia dehan.

Governante ne’e reitera katak MPRM define hodi halo estratéjia ho vizaun nune’e ohin loron, MAKLN reforsa liután liuhusi asina memorandu ida-ne’e. Liuhusi ida-ne’e aumenta kbiit no forsa MPRM nian ba iha implementasaun.

MPRM dehan, servisu ida-ne’e sei iha dezafiu barak maibé parte rua presiza servisu maka’as no kolabora nune’e Investimentu ida-ne’e bele di’ak liu.

Kompañia rua mak sei realiza, ne’ebé MAKLN nia tuteladu mak Kompañia Nasionál Kombatente Veteranu (CNCV) no Kompañia Murak Rai tuteladu husi MPRM.

Notísia relevante:Empreza Unilumin hakarak investe iha rekursu naturál iha TL

Jornalista: Osória Marques

Editór: Rafael Ximenes de A. Belo