Kompañia Zavia finaliza ona projetu merkadu Cailaco
BOBONARO, 24 outubru 2024 (TATOLI) – Prezidente Autoridade Munisípiu Bobonaro, Alexandrino Pires ho ekipa, kuarta ne’e halo vizita surpreza merkadu Marco, postu administrativu Cailaco, munisípiu Bobonaro, ne’ebé ezekuta husi kompañia lokál Zavia Unipesoál Lda.
Obra ne’e implementa liuhusi projetu Programa Dezenvolvimentu Integradu Munisipál (PDIM) tinan 2024.
Iha vizita ne’e, Prezidente Autoridade Munisípiu Bobonaro, observa servisu fíziku ba obra ne’e finaliza ona, hein de’it ona monta plaka atu halo inaugurasaun.
Notísia relevante: Projetu merkadu Marco-Cailaco atinje 79%
“Merkadu ne’e ita halo ho dignu, ita hakarak inan-aman sira fa’an sasán, buka sira-nia moris ho dignu, ida-ne’e mak ita hatudu daudaun,” nia informa ba Jornalista sira, kuarta ne’e hafoin vizita direita merkadu ne’e.
Pires fundamenta, tuir planu merkadu referida sei halo inaugurasaun semana oin iha ámbitu loron bazár.
“Atu nune’e sira sai sasin, sira hakarak dehan ami-nia postu, ami-nia rai, estadu ida-ne’e trata ami-nia moris ho dignu,” nia akresenta.
Nia hatutan, iha tinan tuir mai sei tau tán orsamentu atu kria mós kondisaun iha merkadu ne’e hodi fasilita negosiante sira halo atividade negósiu iha fatin dignu no moos.
Prezidente Autoridade Munisípiu Bobonaro ne’e sente triste no lamenta ho aktu indivudu balu ne’ebé hakarak no estraga fali infraestrutura foun ne’ebé Governu konstrui ne’e.
“Ha’u apelu ona di’akliu hakmatek, lalika ba sobu sasán ne’ebé estadu gasta osan ba ema barak, la’ós ba ema ida de’it nia, di’akliu ita hakmatek lori haree dezenvolvimentu,” nia hakotu.
Negosiante, Saturino Xavier, agradese ba autoridade munisípiu no postu no konsidera infraestrutura foun ne’e di’ak no kualidade tebes.
“Uluk ne’e ami haree merkadu ne’e ladún di’ak, mas agora ne’e Governu halo ami haree ba kualidade di’ak, uluk ne’e ami fa’an sasán iha fatin arbiru loos, ne’ebé ita haree fatin hanesan ai-haan ne’e tau iha rai de’it, mas agora estadu halo foun ita haree ba sasán ita atu haan nia ne’e rai fatin di’ak ona, tanba fatin tolu kedas,” nia dehan.
Enkuantu merkadu ne’e gasta orsamentu ho montante $78,863.89 liuhusi projetu Programa Dezenvolvimentu Integradu Munisipál (PDIM) tinan 2024.
Notísia relevante: IX Governu presiza hadi’ak merkadu Cailaco
Jornalista: Sérgio da Cruz
Editór: Evaristo Soares Martins
