BOBONARO, 24 outubru 2024 (TATOLI) – Membru hamutuk na’in-40 husi klube, eis-futebolista no grupu hadomi-bola, kinta ne’e aprezenta votu mosaun sensura hasoru estrutura Asosiasaun Futeból Bobonaro (AFB) no husu demite prezidente, Domingos Gouveia Moniz, ho nia estrutura ezekutivu.
Mosaun sensura ne’e membru sira aprezenta bazea ba estatutu asosiasaun artigu 15 ho razaun hanesan, la halo enkontru ho membru asosiasaun tomak hodi ko’alia kona-bá futuru dezenvolvimentu futeból iha munisípiu Bobonaro.
Alende ne’e la hato’o relatóriu durante mandatu no nunka realiza torneu iha tinan 2024 nia laran, la hala’o hikas kongresu extraordinária ne’ebé pendente hela, la fó resposta ba karta ne’ebé dirije iha loron 07 outubru 2024 konabá re-kongresu AFB, durante mandatu AFB nunka organiza jorgadór sira atu ba tuir selesaun Timor-Leste nia iha nasionál.
Notísia relevante: AFB preokupa kondisaun estádiu Malibaka Yamato Maliana
“Ho razaun hirak-ne’e hotu maka, ami lakon konfiansa ba prezidente ho estrutura tomak iha Asosiasaun Futeból Bobonaro, ami-nia karta ami hato’o ho abaixu asinadu husi membru Asosiasaun iha anexu tuir estatutu artigu 15,” Portavós ekipa Mosaun Sensura, Domingos Lopes, informa liuhusi konferénsia imprensa ne’ebé hala’o iha Jináziu Maliana, kinta ne’e.
Nia dehan, membru sira prezenta mosaun sensura tanba AFB no Federasaun Futeból Timor-Leste (FFTL) la responde karta ne’ebé submete iha loron 07 outubru liubá kona-ba re-kongresu AFB.
Prezidente klubu Maria-Tapo ne’e fundamenta, membru hotu sei organiza malu atu hala’o kongresu extraordinária ida hodi hili estrutura foun ho programa dezenvolvimentu futeból iha munisípiu Bobonaro.
“Ami-nia planu realiza iha fulan-novembru, maibé ami sei konfirma ho Federasaun Futeból Timor-Leste, sé FFTL la finansia, ami klubu prontu atu aranja orsamentu atu realiza konferénsia,” nia hateten.
Kona-ba kongresu extraordinária FFTL ne’ebé sei realiza iha sábadu (27/10) ne’e, portaós ne’e afirma, Domingos Gouveia Moniz ho estrututra bele ba partisipa hanesan observadór de’it maibé laiha direitu ba votasaun tanba estrutura mamuk.
“Ami mós sei delega ami-nia ema atu ba observa kongresu iha nasionál ne’e, señor Domingos Gouveia Moniz nia mandatu hotu iha 26 setembru, loke ona konferénsia momentu dehan adia semana ida ka rua, maibé to’o agora la realiza, agora nia mandatu laiha ona,” nia tenik.
Hatán ba preokupasaun ne’e, Prezidente Asosiasaun Futeból Bobonaro, Domingos Gouveia Moniz ‘Tenenti’, konsidera mosaun sensura referida laloos, tanba durante ne’e AFB sempre realiza eventu no la kontra regra no estatutu FIFA.
Nia hatutan, durante mandatu konsege prodús arbritrajen 64, treinadór klubu 40 no sempre realiza eventu futeból femeninu no femenina kada tinan dala-rua no dala-tolu.
“Ha’u ema hotu hatene kompetisaun iha-ne’e mós nakloke, bola ne’e ita nakloke aberta ba ema hotu, klubu hotu mak bele ba oin, hau defende prinsípiu, presiza bola ne’e selesaun husi nasionál to’o nível postu ne’e importante, ha’u halo buat ne’e, agora falla ne’e iha-ne’ebé,” nia afirma.
Futebolista lendáriu munisípiu Bobonaro ne’e rekoñese iha tinan 2024 la realiza eventu futeból tanba la hetan alokasaun orsamentu husi FFTL durante tinan rua ona.
Nia parte sei partisipa iha kongresu extraordinária FFTL hanesan prezidente AFB tanba mandatu sei remata iha fulan-novembru tinan 2024.
“Sé kongresu munisipál ha’u la re-eleitu ona, klaru katak nia mak sei ba oin, agora sé mak troka hau ona, bainhira troka ema ida, kongresu ne’e la’ós ha’u mak kansela, sira rasik mak kansela, depois sé mak hakarak, ne’e ha’u mak iha direitu ba partisipa, sé ha’u la ba munisípiu Bobonaro ne’e atu halo nusá,” nia hateten.
Nia parte sei koopera no prontu partisipa iha kongresu munisipál AFB ne’ebé sei realiza iha tempu tuir mai.
Maibé, posiblidade 60% nia parte sei la re-kandidatu ba prezidente AFB tanba deskonfia kongresu ne’e kahur ho polítika.
“Sé mak bele lori Asosiasaun Bobonaro ba oin, iha ona, prepara ona, prontu ha’u entrega didi’ak, maibé 40% ha’u sei kandidatu bainhira ita obriga ema-ne’ebé laiha esperiénsia futeból, bola ne’e ita atu lori ba ne’ebé, ha’u la ambisi prezidente asosiasaun, ha’u hateten deputadu de’it mós ha’u lakohi, sá tan prezidente asosiasaun, maibé tanba Bobonaro ne’e armazein ba futeból nian, hau pronto,” nia akresenta.
Nia garante kongresu munisipál ne’e sei la hetan rezultadu di’ak, tanba membru hirak-ne’ebé aprezenta mosaun sensura maioria seidauk envolve iha ezekutivu AFB.
“Rejimentu ka estatutu hatete, bainhira ema ida atu kandidatu nia-an ba prezidente asosiasaun munisipíu no nasionál, mínimu tinan-haat ou lima envolve iha ezekutivu, sé lae o kaben boot de’it, sei la atinje o-nia mehi ne’e,” nia hateten.
Enkuantu segunda kongreu AFB tuir ajenda ne’ebé trasa realiza iha loron 26 fulan-setembru, maibé membru sira deside kansela no adia ba tempu seluk ho razaun kongresu ne’e kontra estatutu asosiasaun.
Notísia relevante: AFB planu sei realiza jogu futébol tolu iha époka 2022
Jornalista: Sérgio da Cruz
Editór: Evaristo Soares Martins
