BOBONARO, 25 outubru 2024 (TATOLI)-Ministru Agrikultura Pekuaria, Peskas no Floresta, Marcos da Cruz, sesta ne’e, ofisialmente, distribui ba grupu benifisíariu husi Projetu Hasa’e Produtividade Agrikola Sustentavél (HAPAS) hamutuk 23.
Makina hirak ne’ebé distribui ba benifisiáriu grupu SAPIP apoia husi Banku mundiál kompostu husi Hand-Trator 23 makina kuda hare unidade 11, no makina Ko’a-hare 46 ne’ebé kada grupu sei hetan Hand-Tratór ida, makina kuda hare unidade rua no makina Ko’a-hare grupu rua hetan ida.
Iha ámbitu ne’e Ministru Marcos mós entrega Tratór boot no Tratór-liman hamutuk unidade ba Prezidente Autoridade Munisípiu Bobonaro, Alexandre Pires makina agrikola kompostu husi Tratór Bo’ot unidade haat no Hand-Tratór unidade 30 ne’ebé sosa ho orsamentu Estadu.
Ministru Agrikultura Pekuaria, Peskas no Floresta, Marcos da Cruz, hateten makina hirak ne’e distribui oinsá atu motiva agrikultór sira halai natar hodi hasa’e produsaun rai-laran nune’e bele hamenus importasaun husi rai-liur.
Alende ne’e atu moderniza setór agrikultura hodi fasilita agrikultór servisu ho efisiensia no la gasta tempu naruk.
Notisia relevante:MAP apoia grupu 19 iha Balibo Vila dezenvolve projetu HAPAS
“Ita atu hakbi’it agrikultór sira atu bele halo servisu iha sira-nia natar no To’os ho kama’an, ho tempu ne’ebé badak atu bele prodús barak, tanba sira kuandu serbisu de’it ho ekipamentu tradisionál, Katana, Sabit, Insada, Ai-Suak buat sira ne’e ita ko’alia atu hasa’e produsaun ne’e susar, entaun ita fasilita sira ho makina modernu sira ne’e, nune’e tempu ba sira atu halo natar ne’e badak, hanesan uluk fila-rai, prepara rai uza Karau, agora lae uza hand-Trator,” nia informa ba Jornalista sira, iha sentru Extensaun Agrikultura Tunubibi
Reprezentante Banku Mundiál, Etelvina Araújo de Jesus, hateten, Banku Mundiál kontenti tebes atu kolabora ho MAPPF hodi apoia agrikultór sira atu hadi’a setór Agrikultura iha Timor-Leste.
Tuir Etelvina, “Ita hotu hatene agrikultór sira serbisu maka’as durante tempu barak nia laran,dalabarak uza meius tradisionál ka manuál de’it atu bele prodús hare ou produtu lokál sira seluk”.
Alende ne’e, Timor-Leste durante ne’e depende maka’as ba importasaun Fos husi rai-li’ur.
“Entaun ita espera katak ho makina sira ne’ebé apoia ba agrikultór sira bele ajuda sira atu badinas liután, au-mezmu tempu bele halo natar ho medida ida-ne’ebé mak bo’ot-liután, atu nune’e bele ajuda hasa’e ita nia produsaun hare no produtu lokál sira seluk, ho produsaun lokál ne’ebé aumenta ita bele hadi’a ai-han nutritive,” Etelvina énfaze.
Nia fó hanoin ba agrikultór sira katak apoia ne’e hanesan investimentu boot ida ne’ebé governu oferese ho objetivu atu ajuda nasaun Timor-Leste hadi’a produtividade iha setór agrikultura.
“Ho ida-ne’e makina sira ne’ebé fó ba ita-bo’ot sira, mai ho espetativa bo’ot ida katak, ita-bo’ot sira sei mantein uza makina sira ne’e ho kuidadu atu bele uza ba tempu naruk,hodi nune’e bele apoia atividade agrikultor sira ho di’ak,” Etelvina hakotu
Iha biban hanesan, Prezidente Autoridade Munisípiu Bobonaro, Alexandre Pires, agradese esforsu ne’ebé governu halo no konsidera makina hirak ne’ebé bBanku mundiál apoia bele fasilita agrikultór sira halai natar tinan ida dala rua.
“Ami Bobonaro presiza tebes apoia sira ne’e, nune’e ami kompromete apoia ne’ebé ita husi mai ami,sei kuidadu nafatin hanesan ami nia isin-lolon lori hadia ami nia moris no ekonomía povu nia,” autoridade munisipál ne’e hateten.
Atu konklui, nia apela ba grupu sira atu utiliza didi’ak makina hira ne’e no labele fa’an ba interese privada.
Notisia relevante:MAP apoia orsamentu $47,811 ba grupu 10 iha Ritabou implementa projetu HAPAS
Jornalista: Sergio da Cruz
Editór: Rafael Ximenes de A. Belo
