MAE sei avalia dezempeñu autoridade munisipál Covalima
COVALIMA, 29 outubru 2024 (TATOLI) – Ministériu Administrasaun Estatál (MAE), liuhosi diretór jerál sei halo avaliasaun dezempeñu ba Prezidente Autoridade Munisipál Miguel Armada Cardoso ho estrutura no administradór postu hitu.
Autoridade Covalima ne’e dehan, Autoridade Covalima ho nia estrutura sira no Administradór postu hala’o servisu bazeia ba baze legál dekretu lei-númeru 84/2023 ,23 Novembru ho diploma ministeriál 85.
“Ha’u hasai ona karta ba Sekretáriu na’in-tolu diretór Servisu munisipál hahú loron 4 to’o 8 novembru ne’e ekipa husi MAE sei halo avaliasaun kondisaun mínimu ba ita ida-idak ne’ebé hala’o servisu implementa planu asaun anuál (PAA) 2024” Miguel Armada Cardoso dehan iha AMC ohin.
Aleinde, ekipa MAE halo avaliasaun, ekipa mós sei husu durante implementa progama planu asaun anuál 2024 dezafiu sa ida mak diretór munisipál ho administradór postu administrativu hasoru no mós hato’o rekomendasaun.
Miguel mós apela ba diretór munisipál atu prepara nia aan bainhira programa no atividade balun la konsege implementa presiza halo justifikasaun no tau iha ajenda nune’e bele implementa iha novembru-dezembru ne’e.
“Iha implementasaun programa no atividade buat balun ita la’o ladun di’ak, ha’u fiar katak ho esperénsia kada fulan ne’ebé iha, ita prepara aan, nune’e tinan oin implementa di’ak liután,” nia fó hanoin.
Iha sorin seluk, Administradór Postu Administrativu Fohorem, Laurentino de Jesus konfirma, Autoridade postu Maucatar simu informasaun husi Prezidente Autoridade Munisipál kona-ba ekipa atu halo avaliasaun dezempeñu.
“Ita-simu orientasaun husi PAM katak ekipa husi Nasionál mak halo avaliasaun dezempeñu hahú husi PAM, sekretáriu na’in-tolu, diretór munisipál no administradór postu hitu ne’ebé implementa planu programa asaun anuál 2024,” nia realsa.
Enkuantu, Governu sentrál aloka Orsamentu 2024 ba Autoridade Covalima hamutuk $ 7.256.651 atu finánsia ba programa-13 sub-programa 31 ho atividade 74, tuir planu asaun anuál (PAA) ne’ebé apresenta husi kada Diresaun Servisu Munisipál sira.
Husi $ 7.256.651 referidu aloka kategoria lima hanesan aloka ba saláriu no vensimentu $ 2.336.743, bens servisu no korenti $ 846.885, tranferénsia públika $ 2.556.011, kapitál menór $ 166.820, kapitál dezenvolvimentu $ 1.350.192.
Jornalista: Celestina Teles
Editór: Rafael Ximenes de A. Belo
