Promosaun karreira administrasaun públika ho antiguidade sei akontese kada tinan
DILI, 30 outubru 2024 (TATOLI)—Ministru Prezidénsia Konsellu Ministru, Agio Pereira no Prezidente Komisaun Funsaun Públika, Agostinho Letêncio de Deus, aprezenta projetu dekretu-lei ida iha reuniaun ordinária Konseelu Ministru (KM), kuarta ne’e, kona-ba rejime promosaun bazeia ba antiguidade pesoál karreira administrasaun públika.
“Diploma ne’e define katak promosaun ho antiguidade sei akontese tinan-tinan no sei hala’o liuhusi konkursu internu ne’ebé regula husi Komisaun Funsaun Públika, ne’ebé determina vaga sira ne’ebé disponível ba kada grau no kategoria profisionál,” referida nota ne’ebé Agência Tatoli asesu, hafoin reuniaun ezekutivu, iha Palásiu Governu.
Notísia relevante : Rejime eskluzividade prevene funsionáriu públiku públiku akumula empregu remuneradu
Inisiativa lejizlativa ida-ne’e ho objetivu atu garante progresaun iha karreira ba sira ne’ebé la konsege alkansa promosaun bazeia ba méritu iha tinan hirak ikus ne’e tanba razaun oioin.
Aleinde ne’e, rejime ida-ne’e bazeia ba kritériu hanesan antiguidade, avaliasaun dezempeñu, idade, formasaun profisionál, prestasaun servisu iha área remota, komportamentu di’ak no asiduidade.
“Nune’e, hein katak rejime promosaun ne’e bazeia ba antiguidade no sei hamenus estagnasaun iha funsionáriu públiku sira-nia karreira hodi valoriza dedikasaun tinan naruk ba servisu públiku, liu-liu ba sira ne’ebé hasoru difikuldade hodi partisipa iha kompetisaun konvensionál sira,” nota husi Governu fó sai.
Situasaun forsa traballu iha kontestu funsaun públika ba tinan 2023 nian, tuir dadus ne’ebé atualiza iha baze SIGAP Komisaun Funsaun Públika, rejista funsionáriu permanente inklui ajente administrasaun públika ativu ho totál 39.380, ne’ebé kompostu husi feto 14.115 no mane 25.265 no husi númeru ne’e funsionáriu permanente 33.004, ajente administrasaun públika 6376.
Aleinde ne’e, rejista funsionáriu públiku ho idade reforma ne’ebé ho idade 60-resin hamutuk 4.752.
Jornalista : Osória Marques
Editora : Julia Chatarina
